ന്യൂഡൽഹി: കേന്ദ്രസർക്കാരിനും ഇന്ത്യൻ സമ്പദ്‌വ്യവസ്ഥയ്ക്കും കനത്ത ആശങ്കനൽകി ജൂണിൽ വ്യാപാരക്കമ്മി റെക്കാഡ് ഉയരത്തിലെത്തി. കയറ്റുമതി വരുമാനവും ഇറക്കുമതിച്ചെലവും തമ്മിലെ അന്തരമായ വ്യാപാരക്കമ്മി 2021 ജൂണിലെ 961 കോടി ഡോളറിൽ നിന്ന് 2,​563 കോടി ഡോളറിലേക്കാണ് കഴിഞ്ഞമാസം കുതിച്ചുകയറിയത്. ക്രൂഡോയിൽ,​ കൽക്കരി,​ സ്വർണം ഇറക്കുമതിയിലെ വൻ വർദ്ധനയാണ് വ്യാപാരക്കമ്മി കൂടാനുള്ള മുഖ്യകാരണം.

റഷ്യ-യുക്രെയിൻ യുദ്ധപശ്ചാത്തലത്തിൽ ക്രൂഡ്,​ മറ്റ് കമ്മോഡിറ്റി വിലകൾ ഉയർന്നതും ഡോളറിനെതിരെ രൂപ ദുർബലമായതും ഇറക്കുമതിച്ചെലവ് കൂടാനിടയാക്കി. ഇറക്കുമതി ഉത്‌പന്നങ്ങളുടെ വിലകൂടുന്നത് ഇന്ത്യയിൽ നാണയപ്പെരുപ്പം (വിലക്കയറ്റം)​ ഉയരാനും വഴിയൊരുക്കും. 'ഇറക്കുമതി നാണയപ്പെരുപ്പം" അഥവാ ഇംപോർട്ടഡ് ഇൻഫ്ളേഷൻ ഇന്ത്യയെ വലയ്ക്കുന്നുണ്ട്.

ഈ സാഹചര്യത്തിലാണ് കേന്ദ്രസർക്കാർ ആഭ്യന്തര ക്രൂഡോയിൽ കയറ്റുമതിക്ക് നികുതി ഏർപ്പെടുത്തിയതും സ്വർണത്തിന്റെ ഇറക്കുമതി തീരുവ 7.5ൽ നിന്ന് 12.5 ശതമാനമായി ഉയർത്തിയതും. നടപ്പുവർഷത്തെ ആദ്യപാദത്തിൽ (ഏപ്രിൽ-ജൂൺ)​ വ്യാപാരക്കമ്മി 7,​025 കോടി ഡോളറാണ്. മുൻവർഷത്തെ സമാനപാദത്തിൽ ഇത് 3,​142 കോടി ഡോളറായിരുന്നു.

കറന്റ് അക്കൗണ്ട് കമ്മിയും വലയ്ക്കും

കറന്റ് അക്കൗണ്ട് ബാലൻസ് (വിദേശ നാണയവരുമാനവും ചെലവും തമ്മിലെ അന്തരം)​ 'കമ്മി"യായി തുടരുന്ന രാജ്യമാണ് ഇന്ത്യ. കറന്റ് അക്കൗണ്ട് കമ്മി ജനുവരി-മാർച്ചിൽ 1,​300 കോടി ഡോളറായിരുന്നു. ഏപ്രിൽ-ജൂണിൽ ഇത് 3,​000 കോടി ഡോളർ കടന്നുവെന്നാണ് വിലയിരുത്തൽ.

കുതിക്കുന്ന കയറ്റുമതി;

വലയ്ക്കുന്ന ഇറക്കുമതി

കയറ്റുമതി വരുമാനം മികച്ചനിലയിൽ കൂടുന്നുണ്ടെങ്കിൽ അതിനേക്കാൾ വേഗത്തിൽ ഇറക്കുമതിച്ചെലവ് കുതിക്കുന്നതാണ് ഇന്ത്യയ്ക്ക് പ്രതിസന്ധിയാകുന്നത്. 16.78 ശതമാനം വർദ്ധിച്ച് കയറ്റുമതി കഴിഞ്ഞമാസം 3,​794 കോടി ഡോളറിലെത്തി. ഇറക്കുമതി 51 ശതമാനം മുന്നേറി 6,​358 കോടി ഡോളറായി.

$11,670 കോടി

ഏപ്രിൽ-ജൂണിൽ കയറ്റുമതി 22 ശതമാനം ഉയർന്ന് 11,​670 കോടി ഡോളറാണ്. ഇന്ത്യയുടെ എക്കാലത്തെയും ഉയർന്ന ആദ്യപാദ കയറ്റുമതി വരുമാനമാണിത്.

സ്വർണം ഇറക്കുമതി

169% ഉയർന്നു

കറന്റ് അക്കൗണ്ട്,​ വ്യാപാരക്കമ്മികൾ കൂടാനുള്ള കാരണങ്ങളിലൊന്ന് സ്വർണം ഇറക്കുമതി വർദ്ധനയാണ്. ജൂണിൽ 169 ശതമാനം വളർച്ചയുമായി 261 കോടി ഡോളറിന്റെ സ്വർണം ഇന്ത്യ വാങ്ങി. 2021 ജൂണിലെ ഇറക്കുമതി 96.9 കോടി ഡോളറായിരുന്നു. 17 ടണ്ണിൽ നിന്ന് 49 ടണ്ണിലേക്കാണ് ഇറക്കുമതി ഉയർന്നത്.