ശ്രീനഗർ : അമർനാഥിൽ മേഘവിസ്ഫോടനത്തെ തുട‌ർന്നുണ്ടായ പ്രളയത്തിലും മണ്ണിടിച്ചിലിലും മരണമടഞ്ഞവരുടെ എണ്ണം 16 ആയി. മണ്ണിനടിയിൽ കുടുങ്ങിയവർക്കായി സൈന്യവും ഇൻ‌ഡോ-ടിബറ്റൻ ബോർഡർ പൊലീസും തെരച്ചിൽ തുടരുകയാണ്. മരണസംഖ്യ ഇനിയും ഉയർന്നേക്കാം. ദുരന്തമേഖലയിൽ നിന്ന് 15,​000 തീർത്ഥാടകരെ ഗുഹാക്ഷേത്രത്തിന് സമീപത്തെ താഴ്‌വരയിലേക്ക് മാറ്റിപ്പാർപ്പിച്ചു. ‌രക്ഷാപ്രവർത്തനത്തിനായി ദേശീയ ദുരന്ത നിവാരണസേനയുടെ ​ 75 പേരടങ്ങുന്ന മൂന്ന് യൂണിറ്രുകളാണ് രംഗത്തുള്ളത്. കുടുങ്ങിക്കിടക്കുന്നവരെ കണ്ടെത്താനായി അത്യാധുനിക സംവിധാനങ്ങളോടെയാണ് സേനയുടെ രക്ഷാപ്രവർത്തനം. ഹാൻഡ് ഹെൽ‌ഡ് തെർമൽ ഇമേജേഴ്സ്,​ നൈറ്റ് വിഷൻ ഡിവൈസസ് തുടങ്ങിയവയുടെ സഹായത്തോടെയാണ് തെരച്ചിൽ. അത്യാധുനിക സംവിധാനങ്ങളോടുകൂടിയ രണ്ട് ഹെലികോപ്ടറുകൾ,​ വാൾ റഡാർ,‌‌ ഡോഗ് സ്ക്വാഡ് തുടങ്ങിയവ അപകടസ്ഥലത്ത് വിന്യസിച്ചിട്ടുണ്ട്.