നെടുങ്കണ്ടം :11 കെവി ലൈനിൽ നിന്നും വൈദ്യുത ആഘാതമേറ്റ് ബോധരഹിതനായി വഴിയരുകിൽ കിടന്ന ഗൃഹനാഥനെ യുവാവിന്റെ സമയോചിത ഇടപെടലിൽ രക്ഷപെടുത്തി. തിങ്കളാഴ്ച രാവിലെ പുഷ്പകണ്ടം അണക്കരമെട്ട് റോഡിലാണ് സംഭവം. പുഷ്പകണ്ടം തടത്തിൽ അബ്ദുൽ അസീസ് (70) നാണ് വൈദ്യുത ആഘാതത്തെ തുടർന്ന് പൊള്ളലേറ്റ് ബോധരഹിതനായി റോഡിലേക്ക് വീണത്. കർഷകനായ അബ്ദുൽ അസീസ് ഏലച്ചെടികൾ നനക്കനായി സ്ഥാപിച്ചിരുന്ന ഇരുമ്പ് പൈപ്പുകൾ എടുത്ത് മാറ്റുന്നതിനിടെ താഴ്ന്ന് കിടന്ന 11 കെവി ലൈനിൽ ഇരുമ്പ് പൈപ്പ് തട്ടി. വൈദ്യുത ആഘാതമേറ്റതോടെ പുരയിടത്തിൽ നിന്നും റോഡരുകിലേക്ക് തെറിച്ചു വീണു. ഇതിനിടെയാണ് അണക്കരമെട്ട് പുത്തൻചിറയിൽ അഖിൽ റോഡിലൂടെ കടന്നു വന്നത്. അബ്ദുൽ അസീസിന്റെ അടുക്കൽ എത്തിയപ്പോൾ നേരിയ ചലനം മാത്രമെ ഉണ്ടായിരുന്നുള്ളു. സമീപത്ത് ഇരുമ്പ് പൈപ്പ് കിടക്കുന്നത് കണ്ടപ്പോൾ തന്നെ അബ്ദുൽ അസീസിന് വൈദ്യുത ആഘാതമേറ്റെന്ന് അഖിലിന് മനസിലായി. നിലത്ത് കിടന്ന അബ്ദുൽ അസീസിന് ശ്വാസ്വാേഛാസം വീണ്ടെടുക്കാൻ പറ്റാവുന്ന വിധത്തിൽ നെഞ്ചിൽ നന്നായി അമർത്തിക്കൊടുത്തു. ഇതിനിടെ സമീപവാസികളായ ഷൈല, നബീസ എന്നിവരും എത്തി. മറ്റൊരു വാഹനത്തിൽ കയറ്റി അബ്ദുൽ അസിസിനെ തൂക്കുപാലത്തെ സ്വകാര്യ ആശുപത്രിയിൽ എത്തിച്ചു. പ്രഥമ ശുശ്രൂഷ നൽകി അബ്ദുൽ അസീസിനെ വാഹനത്തിലേക്ക് കയറ്റിയപ്പോൾ കൈകൾക്ക് അനക്കം വെച്ചു. 2 കാലുകൾക്കും കൈമുട്ടിനും വയറിനും പൊള്ളലേറ്റു. തീവ്രപരിചരണ വിഭാഗത്തിൽ പ്രവേശിപ്പിച്ച അബ്ദുൽ അസീസ് ആരോഗ്യനില വീണ്ടെടുത്തിട്ടുണ്ട്.