ഇടവെട്ടി: ഗ്രാമ പഞ്ചായത്ത് കുടുംബശ്രീ സി.ഡി.എസിന്റെ ആഭിമുഖ്യത്തിൽ ഇടവെട്ടി പഞ്ചായത്തിൽ ചക്ക ഫെസ്റ്റ് സംഘടിപ്പിച്ചു. പഞ്ചായത്ത് ഓഫീസ് കോമ്പൗണ്ടിൽ നടത്തിയ ഫെസ്റ്റിന്റെ ഉദ്ഘാടനം ഇടവെട്ടി ഗ്രാമ പഞ്ചായത്ത് പ്രസിഡന്റ് ഷീജ നൗഷാദ് നിർവ്വഹിച്ചു. ചക്ക ഉപയോഗിച്ച് ഏതെല്ലാം ഉത്പന്നങ്ങൾ നിർമ്മിക്കാൻ കഴിയുമെന്നും അവയുടെ ഉത്പന്ന സാദ്ധ്യതയെന്തെന്നും ആളുകളിലേക്കെത്തിക്കുകയെന്ന ലക്ഷ്യത്തോടെയായിരുന്നു ഫെസ്റ്റ് സംഘടിപ്പിച്ചത്. ചക്ക ഉപയോഗിച്ച് നിർമ്മിച്ച വിവിധ ഉത്പന്നങ്ങളുടെ വില്പനയും പ്രദർശനവും ഫെസ്റ്റിന്റെ ഭാഗമായി ഒരുക്കി. കേക്ക്, കട്‌ലറ്റ്, പായസം, സ്‌നാക്‌സ്, ലഡു, ഉണ്ണിയപ്പം, തുടങ്ങി ചക്ക കൊണ്ട് നിർമ്മിച്ച വിവിധങ്ങളായ ഭക്ഷ്യവിഭവങ്ങൾ ഫെസ്റ്റ് ആകർഷണീയമാക്കി. ഉദ്ഘാടന ചടങ്ങിൽ സി.ഡി.എസ് ചെയർപേഴ്‌സൺ ഹസീന സുനിൽ അദ്ധ്യക്ഷത വഹിച്ച യോഗത്തിൽ ഗ്രാമപഞ്ചായത്ത് വൈസ് പ്രസിഡന്റ് എ.കെ. സുഭാഷ് കുമാർ, സ്ഥിരം സമിതി അദ്ധ്യക്ഷന്മാരായ ബിൻസി മാർട്ടിൻ, മോളി ബിജു, മെമ്പർമാരായ സുജാത ശിവൻ, സുബൈദ അനസ്, സൂസി റോയ്, ലത്തീഫ് മുഹമ്മദ്, അസീസ് ഇല്ലിക്കൽ, ഗ്രാമ പഞ്ചായത്ത് സെകട്ടറി അബ്ദുൽ സമദ്, സി.ഡി.എസ് അംഗങ്ങൾ, എ.ഡി.എസ് അംഗങ്ങൾ എന്നിവർ സംസാരിച്ചു. ചടങ്ങിൽ വൈസ് ചെയർപേഴ്‌സൺ നിസ അഷറഫ് സ്വാഗതവും മെമ്പർ സെക്രട്ടറി ശരത് നന്ദിയും പറഞ്ഞു.