കോട്ടയം. തീവ്രയജ്ഞ പരിപാടിയുടെ ഭാഗമായി ജില്ലയിൽ 10,631 ഫയലുകൾ തീർപ്പാക്കി. റവന്യൂ വകുപ്പിൽ 4513 ഫയലുകളും മറ്റു വകുപ്പുകളിലായി 6118 ഫയലുകളുമാണ് തീർപ്പാക്കിയതെന്ന് അഡീഷണൽ ജില്ലാ മജിസ്‌ട്രേറ്റ് ജിനു പുന്നൂസ് അറിയിച്ചു. ഞായറാഴ്ച വരെയുള്ള കണക്കാണിത്. ഫയൽ തീർപ്പാക്കൽ വേഗത്തിലാക്കാൻ അവധിദിനമായ ഞായറാഴ്ചയും ഓഫീസുകൾ പ്രവർത്തിച്ചിരുന്നു. കൊവിഡ് കാലത്ത് ഫയലുകൾ കെട്ടിക്കിടക്കാൻ ഇടയാക്കിയതിനെത്തുടർന്നാണ് തീവ്രയജ്ഞം നടത്തുന്നത്. ജില്ലയിൽ മന്ത്രി വി.എൻ. വാസവന്റെ നേതൃത്വത്തിൽ ഫയൽ തീർപ്പാക്കൽ പുരോഗതി എല്ലാ മാസവും വിലയിരുത്തും. സെപ്തംബർ 30 വരെ തീർപ്പാക്കിയ ഫയലുകളുടെ പുരോഗതി ഒക്ടോബർ 10നകം അതത് വകുപ്പുകൾ പ്രസിദ്ധീകരിക്കും. വിവിധ വകുപ്പുകളുടെ വിശദാംശങ്ങൾ ഒക്ടോബർ 15നകം ഉദ്യോഗസ്ഥ-ഭരണപരിഷ്‌കാര വകുപ്പ് പ്രസിദ്ധീകരിക്കും.