കോട്ടയം. മത്സ്യഫെഡിന്റെ വൈക്കം പാലായ്ക്കരി ഫിഷ് ഫാം അക്വാ ടൂറിസംകേന്ദ്രത്തിൽ ഫ്‌ളോട്ടിംഗ് റെസ്റ്റൊറന്റും കാളാഞ്ചി മത്സ്യക്കൂടുകൃഷിയും ഇന്നാരംഭിക്കും. വൈകിട്ട് നാലിന് മത്സ്യക്കൂടു കൃഷി തോമസ് ചാഴിക്കാടൻ എം.പിയും ഒഴുകുന്ന ഭക്ഷണശാല സി.കെ.ആശ എം.എൽ.എ.യും ഉദ്ഘാടനം ചെയ്യും. കായലിനോടു ചേർന്നു കിടക്കുന്ന 117 ഏക്കർ വിസ്തൃതിയുള്ള ഫാമിൽ മത്സ്യകൃഷിയോടൊപ്പം ജലവിനോദ സഞ്ചാരത്തിനും മെച്ചപ്പെട്ട പദ്ധതികളാണ് നടപ്പാക്കുന്നത്. മുപ്പതുപേർക്ക് പ്രകൃതിസൗന്ദര്യം ആസ്വദിച്ച് ഭക്ഷണം കഴിക്കാനുള്ള സൗകര്യമാണ് വെള്ളത്തിൽ പൊങ്ങിക്കിടക്കുന്ന റസ്‌റ്റൊറന്റിലുള്ളത്. മത്സ്യോദ്പാദനം വർദ്ധിപ്പിക്കുകയും അക്വാ ടൂറിസത്തിൽ നൂതനമായ സംവിധാനങ്ങളൊരുക്കുകയും ചെയ്യുകയാണ് മത്സ്യഫെഡ്. മത്സ്യഫെഡ് ചെയർമാൻ ടി. മനോഹരൻ അദ്ധ്യക്ഷത വഹിക്കും.