ഗാന്ധിനഗർ : പ്രമേഹവും അമിത വണ്ണവും ഒത്തുചേർന്നു വരുന്ന ഡയബേസിറ്റി എന്ന രോഗാവസ്ഥയ്ക്ക് പരിഹാരമായി 'മിനി ഗാസ്ട്രിക് ബൈപാസ്' എന്ന താക്കോൽദ്വാര ശസ്ത്രക്രിയ കോട്ടയം മെഡിക്കൽ കോളേജിൽ വിജയകരമായി പൂർത്തിയാക്കി. 132 കിലോ ഭാരമുണ്ടായിരുന്ന ചങ്ങനാശേരി സ്വദേശിയായ 47കാരനിലാണ് ശസ്ത്രക്രിയ നടത്തിയത്. ഉറക്കത്തിൽ ശ്വാസം കിട്ടാതെ വരുന്ന രോഗവുമായി ജൂൺ 25 നാണ് ആശുപത്രിയിൽ പ്രവേശിപ്പിച്ചത്. അതിനൂതന ശസ്ത്രക്രിയയായ മിനി ഗാസ്ട്രിക് ബൈപാസ് ആറാം യൂണിറ്റിലെ ഒബിസിറ്റി ക്ലിനിക് മേധാവി ഡോ.സന്തോഷ് കുമാറിന്റെ നേതൃത്വത്തിലാണ് നടപ്പാക്കിയത്. രണ്ടാഴ്ചത്തെ ചികിത്സയിൽ 15 കിലോ ഭാരം കുറഞ്ഞ രോഗി വെള്ളിയാഴ്ചയോടെ ആശുപത്രി വിട്ടു. 6 മാസം കൊണ്ട് 60 കിലോഗ്രാം തൂക്കം കുറയുമെന്ന് ഡോക്ടർമാർ അഭിപ്രായപെട്ടു. സ്വകാര്യ ആശുപത്രികളിൽ 5 ലക്ഷം രൂപ വേണ്ടി വരുന്ന ചികിത്സയ്ക്ക് മെഡിക്കൽ കോളേജിൽ വളരെ കുറഞ്ഞ ചെലവിൽ നടത്താനായി. ആർ.എം.ഒ ഡോ.ആർ.പി രഞ്ജിൻ ശസ്ത്രക്രിയക്കുള്ള സംവിധാനങ്ങൾ ഒരുക്കി നൽകി. ഡോ. ജോസ് സ്റ്റാൻലി, ഡോ.റിത്വിവിക്, അനസ്‌തേഷ്യ മേധാവി ഡോ. ഷെർലി വർഗ്ഗീസ്, ഹെഡ് നഴ്‌സ് രൂപരേഖ എന്നിവരും പങ്കെടുത്തു.