തലയോലപ്പറമ്പ് : വൈക്കം തലയോലപ്പറമ്പ് റോഡിൽ കൂ​റ്റൻ മരങ്ങളുടെ ശിഖരങ്ങൾ ഒടിഞ്ഞ് വീണു.സംഭവ സമയത്ത് യാത്രക്കാർ ഇല്ലാതിരുന്നതിനാൽ വൻ ദുരന്തം ഒഴിവായി. തലയോലപ്പറമ്പ് വടയാർ പൊട്ടൻചിറ ജംഗ്ഷന് സമീപം ഇന്നലെ രാവിലെ 6 മണിയോടെയാണ് സംഭവം. സ്വകാര്യ വ്യക്തിയുടെ പുരയിടത്തിൽ നിന്ന കൂ​റ്റൻ പരുത്തി, വാക എന്നീ മരങ്ങളുടെ ശിഖരങ്ങൾ പ്രധാന റോഡിലേക്കും സമീപത്തെ വ്യാപാര സ്ഥാപനത്തിന് മുകളിലേക്കും ഒടിഞ്ഞ് വീഴുകയായിരുന്നു. ഇടവട്ടം വിനോദ് ഭവനിൽ ഈ. വി പ്രദീപിന്റെ ഉടമസ്ഥതയിലുള്ള നളിൻസ് എന്ന ടൈലറിംഗ് സ്ഥാപനത്തിന്റെ ഷീ​റ്റ്, ലൈ​റ്റിംഗ് ബോർഡ് എന്നിവ പൂർണമായി തകർന്നു. വൈക്കം, കടുത്തുരുത്തി എന്നിവിടങ്ങളിൽ നിന്നും എത്തിയ ഫയർഫോഴ്‌സും നാട്ടുകാരും ചേർന്ന് ശിഖരങ്ങൾ വെട്ടിമാ​റ്റിയാണ് ഗതാഗതം പുനസ്ഥാപിച്ചത്. തലയോലപ്പറമ്പ് പൊലീസും സ്ഥലത്തെത്തിയിരുന്നു. വൈക്കം തലയോലപ്പറമ്പ് റോഡിൽ ഒരു മണിക്കൂറിലധികം വാഹന ഗതാഗതം തടസപ്പെട്ടു.