കോട്ടയം: മണർകാട് പ്രാദേശിക കോഴി വളർത്തൽ കേന്ദ്രത്തിൽ 1.67 കോടി രൂപ ചെലവഴിച്ച് നടപ്പാക്കിയ നിർമ്മാണനവീകരണ പ്രവർത്തനങ്ങളുടെ ഉദ്ഘാടനം ആഗസ്റ്റിന് 1ന് ഉച്ചയ്ക്ക് 12ന് നടക്കും. മൃഗസംരക്ഷണ വകുപ്പിന്റെ 1.18 കോടി രൂപയുടെ പദ്ധതികളുടെ ഉദ്ഘാടനം മൃഗസംരക്ഷണക്ഷീരവികസന വകുപ്പു മന്ത്രി ജെ. ചിഞ്ചുറാണിയും ജില്ലാപഞ്ചായത്തിന്റെ 49 ലക്ഷം രൂപയുടെ വിവിധ നിർമാണ നവീകരണ പ്രവർത്തനങ്ങളുടെ ഉദ്ഘാടനം സഹകരണ വകുപ്പ് മന്ത്രി വി.എൻ. വാസവനും നിർവഹിക്കും. ഉമ്മൻ ചാണ്ടി എം.എൽ.എ അദ്ധ്യക്ഷത വഹിക്കും.
മൃഗസംരക്ഷണ വകുപ്പിൽ നിന്ന് 89 ലക്ഷം രൂപ ഉപയോഗിച്ച് നിർമ്മിച്ച രണ്ടു പൗൾട്രി ഷെഡുകൾ, 10 ലക്ഷം രൂപ ഉപയോഗിച്ച് നവീകരിച്ച ഓഫീസ് ക്വാർട്ടേഴ്‌സ്, 3.8 ലക്ഷം രൂപയുടെ ആർ.കെ.വി.വൈ. പദ്ധതിയുടെ പൂർത്തീകരണം, 16 ലക്ഷം രൂപയുടെ ബയോ സെക്യൂരിറ്റി എന്നിവയുടെയും ജില്ലാ പഞ്ചായത്തിൽ നിന്നുള്ള 16 ലക്ഷം രൂപ ഉപയോഗിച്ച് നിർമിച്ച ഫാം റോഡിന്റെയും 15 ലക്ഷം രൂപ ഉപയോഗിച്ച് നിർമ്മിച്ച ഡബിൾ സെറ്റർ ഹാച്ചറിന്റെയും 18 ലക്ഷം രൂപ ഉപയോഗിച്ച് ചെയ്ത ഫാം വാർഷിക അറ്റകുറ്റ പണികളുടേയും ഉദ്ഘാടനമാണ് നിർവഹിക്കുന്നത്. കേന്ദ്രത്തിലെ 20 സെന്റ് സ്ഥലത്ത് സോഷ്യൽ ഫോറസ്ട്രിയുമായി സഹകരിച്ച് ആരംഭിച്ച ചന്ദനത്തോപ്പിന്റെ ഉദ്ഘാടനവും നടക്കും. ജില്ലാ പഞ്ചായത്ത് പ്രസിഡന്റ് നിർമ്മല ജിമ്മി, ജില്ലാ മൃഗസംരക്ഷണ ഓഫീസർ ഡോ.ഷാജി പണിക്കശ്ശേരി, ഡോ.പി.കെ. മനോജ് കുമാർ, ഡോ.എൻ. ജയദേവൻ, ഡോ. പി. രാജു, ഡോ. അജയ് കുരുവിള എന്നിവർ പങ്കെടുക്കും. ഉദ്ഘാടനത്തോടനുബന്ധിച്ച് വിവിധ പരിപാടികൾ സംഘടിപ്പിക്കും. സാന്ത്വന സ്പർശം സെമിനാറിന്റെ ഉദ്ഘാടനം ജില്ലാ പഞ്ചായത്ത് വികസനകാര്യ സ്ഥിരം സമിതി അദ്ധ്യക്ഷ മഞ്ജു സുജിത്ത് നിർവഹിക്കും. ജില്ലാ പഞ്ചായത്തംഗം നിബു ജോൺ അദ്ധ്യക്ഷത വഹിക്കും.