കോട്ടയം: വിഖ്യാത ഫോട്ടോ ജേർണലിസ്റ്റ് വിക്ടർ ജോർജിന്റെ സ്മരണാർത്ഥം കെ യു ഡബ്ല്യു ജെ ട്രസ്റ്റ് ഏർപ്പെടുത്തിയ വിക്ടർ ജോർജ് പ്രത്യേക ജൂറി പുരസ്കാരം കേരളകൗമുദി കോട്ടയം യൂണിറ്റിലെ സീനിയർ ഫോട്ടോ ജേർണലിസ്റ്റ് ശ്രീകുമാർ ആലപ്രക്ക്.
മൂന്നാർ പെട്ടിമുടി ഉരുൾ പൊട്ടലിൽ മരണമടഞ്ഞ പതിനെട്ട് പേരുടെ മ്യതദേഹങ്ങൾ ശക്തമായ മഴ പെയ്യുമ്പോൾ ഒരു വലിയ കുഴിയിൽ ഒരുമിച്ച് സംസ്കരിക്കുന്ന ചിത്രത്തിനാണ് പ്രത്യേക അവാർഡ് കിട്ടിയത്.
കഴിഞ്ഞ 22 വർഷമായി കേരളകൗമുദി ഫോട്ടോഗ്രാഫറാണ്. പത്രാധിപർ സ്മാരക അവാർഡ്, നേച്ചർ ഫോട്ടോഗ്രാഫി അവാർഡ്, രാജീവ് ഗാന്ധി സെന്റർ സ്മാരക അവാർഡ്, ഫോട്ടോവൈഡ് അവാർഡ്, ലൂർദ്ദിയൻ ബാസ്ക്കറ്റ് ബോൾ അവാർഡ് തുടങ്ങിയ പുരസ്‌കാരങ്ങൾ ലഭിച്ചിട്ടുണ്ട്.
മണിമല , ആലപ്ര ശ്രീരംഗം വീട്ടിൽ പരേതനായ കെ.കെ.ദാമോദരൻ നായരുടേയും ടി.കെ. ദേവകിയമ്മയുടേയും മകനാണ്. ഭാര്യ രശ്മി ശ്രീകുമാർ , മക്കൾ ദേവനന്ദൻ. എസ്, ദേവദത്തൻ.എസ്.
മറ്റ് അവാർഡുകൾ മലയാള മനോരമ വയനാട് ബ്യൂറോ ഫോട്ടോ ജേർണലിസ്റ്റ് ജിതിൻ ജോയൽ ഹാരിം ഒന്നാം സമ്മാനവും മംഗളം ദിനപത്രം തൊടുപുഴ ബ്യുറോ ഫോട്ടോ ജേർണലിസ്റ്റ് എയ്ഞ്ചൽ അടിമാലിക്ക് പ്രത്യേക പുരസ്കാരവും നൽകും അവാർഡ് സെപ്തംബർ ആദ്യവാരം സമ്മാനിക്കും.
മീഡിയ അക്കാദമി കോഴ്സ് കോ-ഓർഡിനേറ്റർ ലീൻ തോബിയാസ്, മുതിർന്ന മാധ്യമ പ്രവർത്തകൻ ജോസ്.റ്റി.തോമസ്, ദ ഹിന്ദു മുൻ സീനിയർ ഫോട്ടോഗ്രാഫർ എസ്.ഗോപൻ എന്നിവരടങ്ങിയ സമിതിയാണ് അവാർഡ് നിർണയിച്ചത്. കേരളത്തിലെ വിവിധ മാദ്ധ്യമ സ്ഥാപനങ്ങളിലെ ഫോട്ടോ ജേർണലിസ്റ്റുകൾ അയച്ച 79 എൻട്രികളിൽ നിന്നാണ് വിജയികളെ കണ്ടെത്തിയത്.
കോട്ടയം പ്രസ് ക്ലബ്ബിൽ ചേർന്ന വിക്ടർ ജോർജ് അനുസ്മരണ യോഗത്തിൽ മലയാള മനോരമ ചീഫ് ന്യൂസ് എഡിറ്റർ വിനോദ് നായരാണ് അവാർഡ് പ്രഖ്യാപിച്ചത്. തിരുവഞ്ചൂർ രാധാകൃഷ്ണൻ എംഎൽഎ അനുസ്മരണ സമ്മേളനം ഉദ്ഘാടനം ചെയ്തു. മുൻ എം പി സുരേഷ് കുറുപ്പ് വിക്ടർ ജോർജ് ചിത്രപ്രദർശനം ഉദ്ഘാടനം ചെയ്തു.
വിക്ടർ ജോർജിൻ്റെ കുടുംബാംഗങ്ങളും സഹപ്രവർത്തകരും ഒത്തു ചേർന്ന അനുസ്മരണ സമ്മേളനത്തിൽ ക്ലബ്ബ് പ്രസിഡൻ്റ് ജോസഫ് സെബാസ്റ്റ്യൻ അധ്യക്ഷനായിരുന്നു. ചിത്ര കൃഷ്ണൻകുട്ടി, ക്ലബ്ബ് സെക്രട്ടറി റോബിൻ തോമസ് പണിക്കർ, ജില്ലാ കമ്മിറ്റിയംഗം ജോൺ മാത്യു എന്നിവർ സംസാരിച്ചു. മുതിർന്ന ഫോട്ടോ ജേർണലിസ്റ്റുകളെ ചടങ്ങിൽ ആദരിച്ചു