തിരുവനന്തപുരം: ആക്രിക്കച്ചവടക്കാരന്റെ ചവിട്ടേറ്റ് കുടുംബനാഥൻ മരിച്ചു. ഇന്ന് രാവിലെ പത്തരയോടെ കഴക്കൂട്ടത്ത് വച്ചാണ് സംഭവം. നെട്ടയകോണം സ്വദേശി ഭുവനചന്ദ്രനാണ് (65) മരിച്ചത്. ആക്രിക്കച്ചവടക്കാരനെതിരെ കേസെടുത്ത് പൊലീസ് അന്വേഷണം ആരംഭിച്ചു.

രാവിലെ കഴക്കൂട്ടത്ത് ഒരു വീട്ടിൽ ജോലിക്ക് എത്തിയതാണ് ഭുവനചന്ദ്രൻ. ഇതിന് സമീപത്തുള്ള ഒരു കടയിലെ ആളുമായി സംസാരിക്കുന്നതിനിടെ ആക്രിക്കച്ചവടക്കാരനുമായി തർക്കമുണ്ടാകുകയായിരുന്നു. ഭുവനചന്ദ്രൻ നിൽക്കുന്നതിന് സമീപം ഇയാൾ തുപ്പിയതാണ് പ്രശ്നങ്ങൾക്ക് കാരണം.

തർക്കത്തിനിടെ ആക്രിക്കച്ചവടക്കാരൻ ഭുവനചന്ദ്രന്റെ അടിവയറ്റിൽ ചവിട്ടുകയും ശക്തമായ ചവിട്ടിൽ ഭുവനചന്ദ്രൻ നിലത്തുവീഴുകയുമായിരുന്നു. ഭുവനചന്ദ്രനെ സമീപത്തുള്ള ആളുകൾ കഴക്കൂട്ടത്തെ സ്വകാര്യ ആശുപത്രിയിലും അവിടെ നിന്ന് മെഡിക്കൽ കോളേജിലും എത്തിച്ചെങ്കിലും ജീവൻ രക്ഷിക്കാനായില്ല.