ടൊറോന്റോ : കാനഡയിൽ ഒന്റേറിയോയിലെ റിച്ച്മണ്ട് ഹില്ലിൽ വിഷ്ണു ക്ഷേത്രത്തിനകത്ത് സ്ഥാപിച്ചിരുന്ന ഗാന്ധി പ്രതിമയ്ക്ക് നേരെ നടന്ന ആക്രമണത്തിൽ അപലപിച്ച് ഇന്ത്യ. ബുധനാഴ്ചയായിരുന്നു സംഭവം. ഗാന്ധി പ്രതിമയെ അവഹേളിച്ചത് തങ്ങളെ വിഷമിപ്പിച്ചെന്നും വിദ്വേഷകരമായ ഈ സംഭവം കാനഡയിലെ ഇന്ത്യക്കാരുടെ വികാരങ്ങളെ ആഴത്തിൽ വ്രണപ്പെടുത്തിയെന്നും ഇന്ത്യൻ കോൺസുലേ​റ്റ് ജനറൽ ട്വിറ്ററിലൂടെ അറിയിച്ചു. സംഭവം കാനഡയിലെ ഇന്ത്യക്കാരുടെ സുരക്ഷയെ ആശങ്കയിലാക്കുന്നതാണെന്നും ഇത് സർക്കാരിന്റെ ശ്രദ്ധയിൽപ്പെടുത്തിയെന്നും ഇന്ത്യൻ ഹൈക്കമ്മീഷണർ പ്രതികരിച്ചു. സംഭവത്തിൽ അന്വേഷണം വേണമെന്നും ഹൈക്കമ്മീഷണർ ആവശ്യപ്പെട്ടു. 5 മീറ്റർ ഉയരമുള്ള പ്രതിമയ്ക്ക് 30 വർഷത്തെ പഴക്കമുണ്ട്.