കോട്ടയം: പൃഥ്വിരാജ് ചിത്രം കടുവയ്ക്ക് ടിക്കറ്റ് കിട്ടാത്തതിൽ പ്രതിഷേധിച്ച് യുവാവും സഹോദരിയും കൈത്തണ്ടമുറിച്ചു. ഏറ്റുമാനൂർ സ്വദേശികളായ യുവതിയും യുവാവുമാണ് കോട്ടയം അഭിലാഷ് തീയേറ്ററിന് മുന്നിൽ കൈ ഞരമ്പ് മുറിച്ച് ആത്മഹത്യയ്ക്ക് ശ്രമിച്ചത്.

ഫസ്റ്റ് ഷോയ്ക്കായി തിയേറ്ററിലെത്തിയ ഇവർ മദ്യ ലഹരിയിലായിരുന്നെന്ന് പൊലീസ് പറഞ്ഞു. മദ്യലഹരിയിലായതിനാൽ ടിക്കറ്റ് നൽകില്ലെന്ന് തീയേറ്റർ ജീവനക്കാർ അറിയിച്ചതോടെ ഇരുവരും ക്ഷുഭിതരാവുകയും കൈയിലുണ്ടായിരുന്ന ബ്ലേഡ് ഉപയോഗിച്ച് ഞരമ്പ് മുറിക്കുകയുമായിരുന്നു.

തീയേറ്റർ ജീവനക്കാർ ഉടൻ കോട്ടയം വെസ്റ്റ് പൊലീസിൽ വിവരമറിയിച്ചു. പൊലീസ് സ്ഥലത്ത് എത്തി, ഇരുവരുമായി സംസാരിച്ച് പ്രശ്നം പരിഹരിച്ചു. ഇരുവരുടെയും പരിക്ക് ഗുരുതരമല്ലെന്ന് പൊലീസ് അറിയിച്ചു.