ഒമർ ലുലുവിന്റെ സംവിധാനത്തിൽ ഒരുങ്ങുന്ന ഏറ്റവും പുതിയ ചിത്രമാണ് 'നല്ല സമയം'. ഇർഷാദ് ആണ് ചിത്രത്തിലെ നായകൻ. ഒ.ടി.ടി പ്ലാറ്റ്‌ഫോമിനുവേണ്ടി നിർമ്മിക്കുന്ന ചിത്രത്തിൽ നാല് പുതുമുഖ നായികമാരാണ് ഉള്ളത്. വിജീഷ്, ജയരാജ് വാര്യർ എന്നിവരും പ്രധാന കഥാപാത്രങ്ങളായി എത്തുന്നുണ്ട്.
ഹാപ്പി വെഡിംഗ്, ചങ്ക്സ്, ഒരു അഡാറ് ലൗ, ധമാക്ക, പവർ സ്റ്റാർ എന്നീ ചിത്രങ്ങൾക്കു ശേഷം ഒമർ ലുലു സംവിധാനം ചെയ്യുന്ന ആറാമത്തെ ചിത്രമാണ് 'നല്ല സമയം'. ബാബു ആന്റണി നായകനായി എത്തുന്ന പവർ സ്റ്റാർ ഈ വർഷം തന്നെ തിയേറ്ററിൽ എത്തും.
ഇപ്പോഴിതാ, 'നല്ല സമയം' എന്ന ചിത്രത്തിന്റെ വിശേഷങ്ങൾ പങ്കുവയ്ക്കുകയാണ് ഒമർ ലുലു. കൗമുദി മൂവിസിനോടായിരുന്നു സംവിധായകന്റെ പ്രതികരണം.
'പുതിയ ആളുകളെ പ്രമോട്ട് ചെയ്യുക എന്ന ലക്ഷ്യം 'നല്ല സമയ'ത്തിലുണ്ട്. പുതിയ ആളുകളാകുമ്പോൾ ഫ്രഷ്‌നെസ് ഉണ്ടാകും. ഓഡിയൻസിന്റെ പൾസ് മാറിയിട്ടുണ്ട്. ഈ സിനിമ ചെയ്യുമ്പോൾ പ്രൊഡ്യൂസേഴ്‌സ് ജയസൂര്യ എന്നൊക്കയാണ് പറഞ്ഞത്. ഞാൻ നോക്കിയപ്പോൾ തൃശൂർ സ്ലാംഗ് ആണ് ഹെെലെെറ്റ്. എന്തുകൊണ്ട് ഇർഷാദിക്കാനെ നായകനാക്കിക്കൂടാ എന്ന് കരുതി. അദ്ദേഹത്തിനൊരു ബ്രേക്ക് ആകുകയാണെങ്കിൽ നായക നിരയിലേയ്ക്ക് ഒരു കുതിച്ചുചാട്ടം ആകട്ടെ.
മലയാളത്തിലെ എല്ലാ നടന്മാർക്കും പി.ആർ ഏജൻസീസ് ഉണ്ട്. എല്ലാവരും സെൽഫ് പ്രമോഷൻ ചെയ്യാറുണ്ട്. ആക്‌ടർ എന്ന നിലയിൽ ദിലീപേട്ടനെ എനിക്ക് ഇഷ്‌ടമാണ്. ദിലീപേട്ടനെ വച്ച് 'അംബാനി' എന്നൊരു സിനിമ ചെയ്യാൻ പ്ലാനുണ്ട്'- ഒമർ ലുലു പറഞ്ഞു.