തൃശൂർ: ആഡംബര വാഹനങ്ങൾ തമ്മിലുള്ള മത്സരയോട്ടത്തിനിടെ മഹീന്ദ്ര ഥാർ ടാക്സി കാറുമായി കൂട്ടിയിടിച്ചുണ്ടായ അപകടത്തിൽ ഒരാൾ മരിച്ചു. മൂന്നുപേർക്ക് ഗുരുതര പരിക്കേറ്റു. ടാക്സി യാത്രക്കാരനായ പാടുക്കാട് സ്വദേശി രവിശങ്കറാണ് മരിച്ചത്. ഇദ്ദേഹത്തിന്റെ ഭാര്യയുടെ നില ഗുരുതരമാണ്. ഗുരുവായൂർ ക്ഷേത്ര ദർശനത്തിന് ശേഷം മടങ്ങുമ്പോൾ രാത്രി പത്തുമണിയോടെയായിരുന്നു അപകടം.

പോട്ടൂരിൽ വച്ച് മഹീന്ദ്ര ഥാറും ബി.എം. ഡബ്ല്യു കാറും തമ്മിലുള്ള മത്സരയോട്ടത്തിനിടെ ഥാർ ടാക്സിയിലേക്ക് ഇടിച്ചുകയറുകയായിരുന്നു. മദ്യപസംഘത്തിന്റെ മത്സരയോട്ടമാണ് അപകടത്തിന് കാരണമെന്നാണ് നാട്ടുകാരുടെ ആരോപണം. അപകടത്തെതുടർന്ന് ബി.എം.ഡബ്ല്യൂ കാർ നിറുത്താതെ പോയി. ഥാറിൽ ഉണ്ടായിരുന്ന ഒരാളെ നാട്ടുകാർ പിടികൂടി പൊലീസിലേൽപ്പിച്ചു ഇയാൾക്ക് ഒപ്പം വാഹനത്തിലുണ്ടായിരുന്ന മറ്റ് രണ്ട് പേർ അപകടം നടന്നയുടനെ ഓടി രക്ഷപ്പെട്ടു