പാട്ന: ബീഹാറിൽ പടക്കവ്യാപാരിയുടെ വീട്ടിനുള്ളിൽ അനധികൃതമായി പടക്കം നിർമ്മിക്കുന്നതിനിടെയുണ്ടായ സ്ഫോടനത്തിൽ ആറ് പേർ മരിച്ചു.

ഛപ്രയിൽ ബുദായി ബാഗ് ഗ്രാമത്തിൽ ഷബീർ ഹുസൈൻ എന്ന പടക്കവ്യാപാരിയുടെ വീട്ടിലാണ് സ്‌ഫോടനമുണ്ടായത്. പൊട്ടിത്തെറിയിൽ കെട്ടിടത്തിന്റെ ഒരു ഭാഗം തകർന്നു. ബാക്കി ഭാഗത്ത് തീ പിടിച്ചു. നദിക്കരികിലെ വീടിന്റെ ഭാഗം തകർന്നു വീണത് വെള്ളത്തിലേക്കായിരുന്നു. അവശിഷ്ടങ്ങൾക്കിടയിൽ എട്ടോളം പേർ കുടുങ്ങിക്കിടക്കുകയാണ്. പരിക്കേറ്റ എട്ട് പേരെ ആശുപത്രിയിലേക്ക് മാറ്റി. രക്ഷാപ്രവർത്തനം തുടരുകയാണ്. അപകടസ്ഥലത്ത് ഏകദേശം ഒരുമണിക്കൂറോളം തുടർച്ചയായി പടക്കങ്ങൾ പൊട്ടിയിരുന്നു.