കൊല്ലം: ഓൺലൈനിൽ പരിചയപ്പെട്ട പ്രണയിനിയുടെ നഗ്നദൃശ്യങ്ങൾ പ്രചരിപ്പിച്ച പ്രവാസി യുവാവ് കരുനാഗപ്പള്ളി പൊലീസിന്റെ പിടിയിലായി. ഇരവിപുരം വാളത്തുംഗൽ പുത്തൻചന്ത ജംഗ്ഷന് സമീപം ഷാ മൻസിലിൽ അജ്മൽഷായാണ് (24) പിടിയിലായത്.

ഇൻസ്റ്റാഗ്രാം വഴി പരിചയപ്പെട്ട യുവതിയെ വിവാഹ വാഗ്ദാനം നൽകി നഗ്നദൃശ്യങ്ങൾ കൈക്കലാക്കിയ ശേഷം വ്യാജ അക്കൗണ്ട് നിർമ്മിച്ച് പ്രചരിപ്പിക്കുകയായിരുന്നു. പെൺകുട്ടി 2021ൽ കരുനാഗപ്പള്ളി പൊലീസിൽ നൽകിയ പരാതിയിൽ ഐ.ടി ആക്ട് പ്രകാരം നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്. വിദേശത്തായിരുന്ന പ്രതിക്കായി ലുക്കൗട്ട് നോട്ടീസ് പുറപ്പെടുവിച്ചിരുന്നു. കഴിഞ്ഞ ദിവസം തിരുവനന്തപുരം വിമാനത്താവളത്തിൽ എത്തിയപ്പോൾ തടഞ്ഞുവയ്ക്കുകയും അറസ്റ്റ് ചെയ്യുകയുമായിരുന്നു. കരുനാഗപ്പള്ളി ഇൻസ്‌പെക്ടർ ജി. ഗോപകുമാറിന്റെ നേതൃത്വത്തിൽ എസ്.ഐമാരായ അലോഷ്യസ് അലക്സാണ്ടർ, പ്രമോദ്, സി.പി.ഒ ഷാഹുൽ എന്നിവരടങ്ങിയ സംഘമാണ് ഇയാളെ അറസ്റ്റ് ചെയ്തത്.