പോർട്ട് ഒഫ് സ്പെയ്ൻ: അവസാന ഓവർ വരെ ആവേശം നിലനിന്നിരുന്ന ഇന്ത്യ-വിൻഡീസ് രണ്ടാം ഏകദിന മത്സരത്തിൽ തിളങ്ങിയ സഞ്ജു സാംസണിന് അഭിനന്ദന പ്രവാഹവും പിന്തുണയും. മത്സരത്തിൽ ടോസ് നേടി ബാറ്റിംഗ് തിരഞ്ഞെടുത്ത വെസ്റ്റ് ഇൻഡീസ് നിശ്ചിത 50 ഓവറിൽ ആറ് വിക്കറ്റ് നഷ്ടത്തിൽ 311 റൺസടിച്ചു. മറുപടിക്കിറങ്ങിയ ഇന്ത്യ 2 പന്തും 2വിക്കറ്റും ശേഷിക്കെ വിജയലക്ഷ്യത്തിലെത്തുകയായിരുന്നു.
അക്ഷർ പട്ടേൽ (35 പന്തിൽ പുറത്താകാതെ 64), സഞ്ജു സാംസൺ (51 പന്തിൽ 54), ശ്രേയസ് അയ്യർ (63) എന്നിവരുടെ സമയോചിതമായ അർദ്ധ സെഞ്ച്വറികളാണ് ഒരു ഘട്ടത്തിൽ തോൽവി മുന്നിൽക്കണ്ട ഇന്ത്യയ്ക്ക് ഗംഭീര ജയമൊരുക്കിയത്. സഞ്ജുവിന്റെയും അക്ഷറിന്റെയും കന്നി ഏകദിന അർദ്ധ സെഞ്ച്വറികളായിരുന്നു ഇത്.
പ്രതിസന്ധി സമയത്ത് ബാറ്റ് കൊണ്ട് ഇന്ത്യൻ വിജയത്തിൽ നിർണായക പങ്കുവഹിച്ച മലയാളി വിക്കറ്റ് കീപ്പർ ബാറ്റർ സഞ്ജു സാംസണിനെ പ്രശംസിച്ച് നിരവധിയാളുകളാണ് എത്തിയത്. ഈയിടെ അയർലൻഡിനെതിരായ ട്വന്റി-20യിൽ അർദ്ധ സെഞ്ച്വറി സഞ്ജു നേടിയിരുന്നു.
ഇപ്പോഴിതാ ഇന്ത്യൻ ദേശീയ ടീമിൽ സ്ഥിരമായി അവസരം നൽകിയാൽ സഞ്ജു സാംസണിന്റെ തകർപ്പൻ പ്രകടനം കാണാമെന്ന് പറഞ്ഞ് രംഗത്തെത്തിയിരിക്കുകയാണ് പാകിസ്ഥാന്റെ മുൻ താരം ഡാനിഷ് കനേരിയ. വിൻഡീസിനെതിരായ രണ്ടാം ഏകദിനത്തിലെ സഞ്ജുവിന്റെ പ്രകടനത്തിന് പിന്നാലെയാണ് കനേരിയയുടെ പരാമർശം.
സഞ്ജു വളരെ മികച്ച കളിക്കാരനാണെന്നും സ്ഥിരമായി അവസരം നൽകിയാൽ അദ്ദേഹം മികച്ച പ്രകടനം പുറത്തെടുക്കുമെന്നതിൽ സംശയം വേണ്ടെന്നും കനേരിയ പറഞ്ഞു. നീണ്ട ഇന്നിംഗ്‌സ് കളിക്കാനുള്ള കഴിവ് സഞ്ജുവിനുണ്ടെന്നും അദ്ദേഹം കൂട്ടിച്ചേ‌ർത്തു.
രാജ്യാന്തര ക്രിക്കറ്റിൽ ലഭിക്കുന്ന അവസരങ്ങൾ സഞ്ജു മുതലാക്കുന്നില്ലെന്ന് പലതവണ വിമർശനങ്ങൾ കേട്ടിട്ടുള്ളതാണ്. ഇതിനിടയിലാണ് പിന്തുണയുമായ് മുൻ പാക് താരം എത്തിയിരിക്കുന്നത്.
An amazing display of class from @IamSanjuSamson! He showed poise throughout these incredible plays.
— FanCode (@FanCode) July 24, 2022
Watch the India tour of West Indies LIVE, only on #FanCode👉 https://t.co/RCdQk1l7GU@BCCI @windiescricket#WIvIND #INDvsWIonFanCode #INDvsWI pic.twitter.com/yHVSlYdDPK