മംഗളൂരു: സുള്ള്യയിലെ യുവമോർച്ച നേതാവിന്റെ കൊലപാതകത്തിൽ പ്രതികൾ മലയാളികളെന്ന് സൂചന. യുവമോർച്ച ജില്ലാ എക്സിക്യുട്ടിവ് കമ്മിറ്റി അംഗമായ പ്രവീൺ (32) ആണ് കൊല്ലപ്പെട്ടത്. അന്വേഷണത്തിനായി കർണാടക പൊലീസിന്റെ പ്രത്യേക സംഘം കേരളത്തിലെത്തും.

കർണാടക പൊലീസ് മേധാവി കേരള ഡിജിപിയുടെ സഹായം തേടിയിട്ടുണ്ട്. പ്രതികളെക്കുറിച്ച് വ്യക്തമായ സൂചന ലഭിച്ചിട്ടുണ്ടെന്ന് മംഗളൂരു എസ് പി അറിയിച്ചു. കൊലപാതക സംഘം കേരള രജിസ്‌ട്രേഷനുള്ള ബൈക്കിലാണ് എത്തിയതെന്ന് ദൃക്‌സാക്ഷികൾ പൊലീസിന് മൊഴി നൽകിയിരുന്നു. ഈ വാഹനം ഇന്നലെ അന്വേഷണ സംഘം കസ്റ്റഡിയിലെടുത്തിരുന്നു.

ബെല്ലാരയിൽ പൗൾട്രി ഫാം നടത്തിപ്പുകാരനായ പ്രവീൺ, ചൊവ്വാഴ്ച രാത്രി ഒമ്പതോടെ വീട്ടിലേക്ക് പോകാനിറങ്ങുമ്പോൾ ബൈക്കിലെത്തിയ രണ്ടംഗസംഘം വെട്ടിക്കൊല്ലുകയായിരുന്നു. ഈ മാസം 21ന് സുളള്യ പുത്തൂർ സ്വദേശി മുഹമ്മദ് മസ്ഊദ്നെ എട്ടംഗ സംഘം കൊലപ്പെടുത്തിയിരുന്നു. ഇതിന് പ്രതികാരമാണ് യുവമോർച്ച നേതാവിന്റെ കൊലപാതകമെന്നാണ് പൊലീസ് കരുതുന്നത്.