പുതിയ കാലത്തിലെ താത്പര്യങ്ങൾക്കനുസരിച്ച് എപ്പോഴും മാറാൻ താത്പര്യപ്പെടുന്ന ആപ്പ് ആണ് വാട്ട്സാപ്പ്. ഉപഭോക്താക്കളിൽ എല്ലാ തലമുറകളിൽപ്പെട്ടവരും ഉണ്ടെന്നതിനാൽ തന്നെ ഇരുകൂട്ടരെയും തൃപ്തിപ്പെടുത്താൻ പാകത്തിലുള്ള അപ്‌ഡേറ്റുകളാണ് വാട്ട്സാപ്പ് എപ്പോഴും നൽകുക. സ്ഥിരമായി തങ്ങളുടെ ആപ്പിൽ അപ്ഡേറ്റുകൾ നൽകാറുള്ല വാട്ട്സാപ്പ് പതിവ് തെറ്റിക്കാതെ ഇത്തവണയും ഒരു അപ്ഡേറ്റുമായി എത്തിയിരിക്കുകയാണ്.

ആപ്പിന്റെ സ്റ്റാറ്റസ് വിഭാഗത്തിലാണ് പുതിയ അപ്ഡേറ്റ്. ഇത്രയുംകാലം ഫോട്ടോകളും വീഡിയോകളും മാത്രമാണ് വാട്ട്സാപ്പ് അപ്ഡേറ്റ് ആയി നൽകാൻ സാധിച്ചിരുന്നത്. എന്നാൽ ഇനി മുതൽ വോയ്സ് നോട്ടുകളും സ്റ്റാറ്റസ് ആയി നൽകാൻ സാധിക്കും. പുതിയ അപ്ഡേറ്റ് പരീക്ഷണഘട്ടത്തിൽ മാത്രമാണെന്നും തിരഞ്ഞെടുത്ത ഏതാനും വാട്ട്സാപ്പ് ഉപഭോക്താക്കൾക്ക് മാത്രമാണ് നിലവിൽ ഈ അപ്ഡേറ്റ് ലഭ്യമായിട്ടുള്ളതെന്നും അന്താരാഷ്ട്ര ടെക്ക് വാരികകൾ റിപ്പോർട്ട് ചെയ്തിരുന്നു. അതേസമയം പുതിയ അപ്ഡേഷൻ സംബന്ധിച്ച ഒരു വിവരവും വാട്ട്സാപ്പ് ഔദ്യോഗികമായി പുറത്തു വിട്ടിട്ടില്ല.

യൂസർ എക്സ്പീരിയൻസ് വർദ്ധിപ്പിക്കുന്നതിന്റെ ഭാഗമായിട്ടാണ് വാട്ട്സാപ്പ് പുതിയ അപ്ഡേറ്റുകൾ പരീക്ഷിക്കുന്നത്. നിലവിൽ ആൻ‌ഡ്രോയിഡ് പതിപ്പിൽ മാത്രമായിരിക്കും പുതിയ അപ്ഡേറ്റ് ലഭ്യമാകുക. വിൻഡോസ് ഉപഭോക്താക്കൾ കുറച്ചുകൂടി കാത്തിരിക്കേണ്ടി വരും. വാട്ട്സാപ്പ് ബീറ്റയുടെ 2.22.16.3 പതിപ്പിന്റെ ഭാഗമായിട്ടാകും പുതിയ അപ്ഡേറ്റ് ലഭ്യമാകുക. പുതിയ ബീറ്റാ പതിപ്പിൽ സ്റ്റാറ്റസ് സെക്ഷനിൽ ഒരു മൈക്രോഫോൺ ഐക്കൺ കൂടി ഉണ്ടായിരിക്കും. ഇതിലൂടെ ഉപഭോക്താക്കൾക്ക് ഓഡിയോ സ്റ്റാറ്റസ് അപ്‌ലോഡ് ചെയ്യാൻ സാധിക്കും,.