മഞ്ചേരി: മഞ്ചേരിയിൽ 50 ലക്ഷം രൂപയുടെ കുഴൽപ്പണം കവർച്ച നടത്തിയ കേസിലെ മുഖ്യപ്രതി കീഴടങ്ങി. എടവണ്ണ ചാത്തല്ലൂർ സ്വദേശി ഉഴുന്നൻ സുനീബാണ് (29) ജില്ലാ സെഷൻസ് കോടതി മുൻമ്പാകെ കീഴടങ്ങിയത്.
കഴിഞ്ഞ മേയ് 18ന് കുഴൽപ്പണവുമായി ഇരുചക്ര വാഹനത്തിൽ പോവുകയായിരുന്നയാളെ മഞ്ചേരി വീമ്പൂരിൽ വച്ച് മോട്ടോർസൈക്കിളിൽ വന്ന് ഇടിച്ചു വീഴ്ത്തി കണ്ണിൽ മുളക് പൊടിയെറിഞ്ഞാണ് 50 ലക്ഷം രൂപയുടെ കുഴൽപ്പണം കവർച്ച ചെയ്തത്. സംഭവത്തിലെ മുഖ്യപ്രതിയായ
ഉഴുന്നൻ സുനീബ് തമിഴ്നാട്, മഹാരാഷ്ട്ര എന്നിവിടങ്ങളിൽ ഒളിവിൽ കഴിഞ്ഞുവരികയായിരുന്നു.
കേസിലെ കൂട്ട് പ്രതിയെ ഡൽഹിയിൽ വെച്ച് മഞ്ചേരി പൊലീസ് നേരത്തെ പിടികൂടിയിരുന്നു. കോടതിയിൽ കീഴടങ്ങിയ പ്രതി പൊലീസ് മുൻപാകെ കുറ്റം സമ്മതിച്ചു. നിരവധി തവണ സമാന കുറ്റകൃത്യത്തിൽ ഏർപ്പെട്ട പ്രതി ആദ്യമായാണ് പിടിക്കപ്പെടുന്നത്. കുഴൽപ്പണമായതിനാലും പരാതി ഇല്ലാത്തതിനാലും പലതവണ രക്ഷപെടുകയായിരുന്നു. ഈ കേസുമായി ബന്ധപ്പെട്ട എല്ലാവരുടെയും സാമ്പത്തിക സ്രോതസ് അന്വേഷിക്കുന്നതിനായി പൊലീസ് എൻഫോഴ്സ്‌മെന്റ് ഡയറക്ടറേറ്റ് മുമ്പാകെ റിപ്പോർട്ട് നൽക്കും.