നാരങ്ങാനം: ​ കന്നുകാലികളുടെ വിസർജ്യം തോട്ടിലേക്ക് തള്ളുന്നതായി പരാതി. നാരങ്ങാനം കടമ്മനിട്ട ഇളപ്പുങ്കൽ തുണ്ടിയിൽ ഭാഗത്തുള്ള പൂതകര​ തുണ്ടിയിൽ ​ താഴത്തേപടി തോട്ടിലേക്കാണ് സ്വകാര്യ വ്യക്തി കന്നുകാലികളുടെ ചാണകവും മൂത്രവും ഒഴുക്കിവിടുന്നത്. പത്തോളം പശുക്കളെ വളർത്തുന്നുണ്ടെങ്കിലും ചാണകവും മൂത്രവും സംഭരിക്കുന്നതിനോ, സംസ്‌കരിക്കുന്നതിനോ ഇവിടെ സൗകര്യമില്ല. ഇതു മുഴുവൻ സമീപത്തെ തോട്ടിലേക്ക് തള്ളുകയാണ്.പല ആവശ്യങ്ങൾക്കും ഈ തോട്ടിലെ വെളളം സമീപവാസികൾ ഉപയോഗിച്ചിരുന്നെങ്കിലും ഇപ്പോൾ തോട്ടിൽ ഇറങ്ങാൻ കഴിയാത്ത അവസ്ഥയാണ്. സമീപത്തെ കിണറുകളിലെ വെള്ളവും മലിനമായി തുടങ്ങിയതായി നാട്ടുകാർ പറയുന്നു. ദുർഗന്ധം കാരണം ഈ പ്രദേശത്തുകൂടി യാത്ര ചെയ്യാൻ കഴിയാത്ത അവസ്ഥയാണ്.
പഞ്ചായത്തിൽ പരാതി നൽകിയെങ്കിലും യാതൊരു നടപടിയും ഇതുവരെ ഉണ്ടായില്ല.തോട്ടിലിറങ്ങുന്നവരുടെ കാലുകൾ ചൊറിയുന്നതായും ചെറിയ കുരുക്കൾ വരുന്നതായും പറയുന്നു.
പഞ്ചായത്തധികൃതർ അടിയന്തരമായി നടപടി സ്വീകരിക്കണമെന്ന് നാട്ടുകാർ ആവശ്യപ്പെടുന്നു.