കോഴഞ്ചേരി: പണിതുടങ്ങി വർഷങ്ങൾ പിന്നിട്ടിട്ടും പൂർത്തിയാകാതെ ഇലന്തൂർ പഞ്ചായത്ത് സ്റ്റേഡിയം. 2019 നവംബറിലാണ് സ്റ്റേഡിയത്തിന്റെ നിർമ്മാണോദ്ഘാടനം നടന്നത്. ഫുട്‌ബാൾ, വോളിബാൾ, ക്രിക്കറ്റ് കോർട്ടുകൾ, സിന്തറ്റിക്ക് ട്രാക്ക്, പവലിയൻ, ചുറ്റുമതിൽ എന്നിവയാണ്പദ്ധതിയിലുള്ളത്. ഇതിനായി 88 ലക്ഷം രൂപയാണ് വകയിരുത്തിയത്. വീണാജോർജ് എം.എൽ.എയുടെ ആസ്തി വികസന ഫണ്ടിൽ നിന്നാണ് തുക അനുവദിച്ചത്. സ്റ്റേഡിയത്തിന്റെ പണി ഒരു വർഷത്തിനുള്ളിൽ പൂർത്തിയാക്കുമെന്നാണ് അന്ന് പറഞ്ഞത്.
സ്റ്റേഡിയം പഞ്ചായത്തിന്റെ ഉടമസ്ഥതയിലാണെങ്കിലും പണി ഏറ്റെടുത്ത് നടത്തുന്നത് സ്‌പോർട്സ് എൻജിനീയറിങ് വിഭാഗമാണ്. പണി ആരംഭിച്ചിരുന്നെങ്കിലും കരാറുകാരൻ മരിച്ചതോടെ മുടങ്ങുകയായിരുന്നു. പമ്പാ ഇറിഗേഷൻ പദ്ധതിയുടെ ഭാഗമായി 1,2,3,4,5 വാർഡുകളിലേക്കുള്ള സബ് കനാൽ, സ്റ്റേഡിയത്തിന് അടിയിലുടെയാണ് പോകുന്നത്. പത്ത് ലക്ഷം രൂപ മുടക്കി സബ് കനാൽ പണിതെങ്കിലും വാർഡുകളിൽ വെള്ളം ലഭിച്ചില്ല. ഇതിനായിനായി ഇനിയും സ്റ്റേഡിയത്തിൽ പണി നടത്തണമെന്ന സ്ഥിതിയാണ്. സബ് കനാൽ പണിയുമായി ബന്ധപ്പെട്ടേ സ്റ്റേഡിയത്തിന്റെ പണിയും ഉണ്ടാകു.

സ്‌പോർട്സ് എൻജിനീയറിങ് വിഭാഗത്തിനാണ് ചുമതലയെന്നും പണിമുടങ്ങിയതിനെ തുടർന്ന് നിരവധി തവണ ഇവരെ ബന്ധപ്പെട്ടെങ്കിലും നടപടിയുണ്ടായില്ലെന്നും മുൻ പഞ്ചായത്ത് പ്രസിഡന്റ് എം.എസ്. സിജു പറഞ്ഞു.