പത്തനംതിട്ട: ജില്ലയിലെ ഏഴ് സർക്കാർ സ്‌കൂളുകളിലും രണ്ട് ബ്ലോക്ക് പഞ്ചായത്തുകളിലും സൗരോർജ വൈദ്യുത നിലയങ്ങൾ സ്ഥാപിച്ചതായി അനർട്ട് ജില്ലാ പ്രോജക്ട് എൻജിനിയറുടെ ചുമതലയുള്ള ബി. അഖിൽ അറിയിച്ചു. കീഴ്വായ്പൂര് ജി.വി.എച്ച്.എസ്.എസ്, തിരുവല്ല ജി.എം.ജി.എച്ച്.എസ്, പന്തളം ജി.യു.പി.എസ്, പൂഴിക്കാട് ജി.യു.പി.എസ്, അടൂർ ജി.യു.പി.എസ് എന്നിവിടങ്ങളിൽ അഞ്ച് കിലോവാട്ട് ഓൺ ഗ്രിഡ് സൗരവൈദ്യുതി നിലയം സ്ഥാപിച്ചു. വെട്ടിപ്പുറം ജി.എൽ.പി.എസിലും ഏഴംകുളം ജി.എൽ.പി.എസിലും മൂന്ന് കിലോ വാട്ട് ഓൺഗ്രിഡ് സൗര വൈദ്യുതി നിലയം സ്ഥാപിച്ചു. പദ്ധതി ചെലവിന്റെ 10 ശതമാനം തുക സൗര വൈദ്യുതിയിലേക്കു മാറിയതിനുള്ള പ്രോത്സാഹനമായി ഈ രണ്ടു സ്‌കൂളിനും അനുവദിച്ചു.
പുളിക്കീഴ് ബ്ലോക്ക് പഞ്ചായത്തിൽ അഞ്ച് കിലോവാട്ടിന്റെയും കോയിപ്രം ബ്ലോക്ക് പഞ്ചായത്തിൽ മൂന്നു കിലോവാട്ടിന്റെയും ഓഫ് ഗ്രിഡ് സൗരനിലയങ്ങൾ സ്ഥാപിച്ചു. കേന്ദ്ര നവ പുനരുപയോഗ ഊർജ വകുപ്പിന്റെ 30 ശതമാനം സബ്‌സിഡിയോടെയാണ് പദ്ധതി നടപ്പാക്കിയത്. കുന്നന്താനം ഗ്രാമപഞ്ചായത്തിലെയും ഇലന്തൂർ ബ്ലോക്ക് പഞ്ചായത്തിലെയും പട്ടികജാതി കോളനികളിൽ സൗര തെരുവു വിളക്കുകൾ സ്ഥാപിക്കുന്നതിനുള്ള പ്രാഥമിക പഠനം പൂർത്തീകരിച്ചു. തുമ്പമൺ ഗ്രാമപഞ്ചായത്ത് സാംസ്‌കാരിക നിലയത്തിൽ ഓൺഗ്രിഡ് സൗര വൈദ്യുതി നിലയം സ്ഥാപിക്കുന്നതിനുള്ള പ്രാഥമിക പഠനം പൂർത്തിയാക്കി. പദ്ധതി ചെലവിന്റെ 10 ശതമാനം തുക സൗര വൈദ്യുതിയിലേക്ക് മാറിയതിനുള്ള പ്രോത്സാഹനമായി പഞ്ചായത്തിന് അനുവദിച്ചു. മൊബൈൽ ഫോൺ ചാർജ് ചെയ്യാൻ സൗകര്യമുള്ള സൗര റാന്തലും റേഡിയോയും ഉൾപ്പെടുന്ന 111 സൗര സുവിധാ കിറ്റുകളുടെ വിതരണം കോന്നി ഫോറസ്റ്റ് ഡിവിഷനിൽ പൂർത്തിയായി. റാന്നിയിലെ പട്ടികജാതി കുടികളിൽ 109 സൗര സുവിധാ കിറ്റുകൾ വിതരണം ചെയ്തു.