മല്ലപ്പളളി : വ്യാവസായ വകുപ്പിന്റെ മിനി ഇൻഡസ്ട്രിയൽ എസ്റ്റേറ്റിലേക്കുള്ള റോഡിന്റെ ശോച്യാവസ്ഥക്ക് പരിഹാരം ഉണ്ടാകണമെന്ന ആവശ്യം ശക്തമാകുന്നു. റോഡിൽ കുണ്ടും കുഴിയും നിറഞ്ഞ് സഞ്ചാരയോഗ്യമല്ലാതായിട്ട് മാസങ്ങൾ കഴിഞ്ഞു. ഇതു വഴിയുള്ള കാൽനട യാത്ര പോലും ദുസഹമായിരിക്കുകയാണ്. വർഷങ്ങൾക്ക് മുൻപ് പ്രവർത്തനം തുടങ്ങിയ മിനി ഇൻഡസ്ട്രിയൽ എസ് സ്റ്റേറ്റ്, പ്രസ്, പെറ്റ് ബോട്ടിൽ, ഐസ്, ഫർണിച്ചർ, റമ്പർ ചവിട്ടി, വയറിംഗ് പൈപ്പ്, ഇരുമ്പ് അലമാര തുടങ്ങി പത്തോളം വ്യവസായങ്ങളാണ് ഇവിടെ പ്രവർത്തിക്കുന്നത്. നിരവധി വാഹനങ്ങൾ എത്തുന്ന ഈ റോഡിലെ ടാറിംഗ് പൂർണമായും ഇളകിയ നിലയിലാണ്. മെറ്റൽ ഇളകി കിടക്കുന്നത് അപകടങ്ങൾക്കും കാരണമാകുന്നു. മഴ പെയ്യുമ്പോൾ റോഡിൽ രൂപപ്പെട്ടിരിക്കുന്ന വലിയ ഗർത്തങ്ങളിൽ വെള്ളം കെട്ടി കിടക്കുന്നത് അപകട സാദ്ധ്യത വർദ്ധിക്കുന്നതിന് കാരണമാകുന്നു. റോഡ് സഞ്ചാരയോഗ്യമാക്കുന്നതിന് നടപടി ഉണ്ടാകണമെന്ന ആവശ്യവും ശക്തമായിരിക്കുകയാണ്. എന്നാൽ അധികൃതരുടെ അനാസ്ഥയാണ് റോഡിന്റെ ഈ ദുരവസ്ഥക്ക് കാരണമെന്ന് ആക്ഷേപം ഉയർന്നിട്ടുണ്ട്.