തിരുവല്ല: മുൻവൈരാഗ്യത്തിന്റെ പേരിൽ അയൽവാസിയുടെ ഒന്നര ലക്ഷത്തോളം രൂപ വിലമതിക്കുന്ന ബൈക്ക് കത്തിച്ച സംഭവത്തിൽ യുവാവിനെ പുളിക്കീഴ് പൊലീസ് അറസ്റ്റുചെയ്തു. തിരുവല്ല നിരണം കൊമ്പങ്കേരി വീട്ടിൽ ബിജി ചാക്കോ (32) ആണ് പിടിയിലായത്. നിരണം കൊമ്പങ്കേരി മാനാങ്കേരിൽ വീട്ടിൽ സോമേഷ് സോമന്റെ പൾസർ ബൈക്കാണ് പൂർണമായും കത്തിനശിച്ചത്. വ്യാഴാഴ്ച അർദ്ധരാത്രിയോടെ ആയിരുന്നു സംഭവം. ബൈക്കിന് തീപിടിക്കുന്നത് കണ്ട് പുറത്തിറങ്ങിയ സോമേഷ് വീട്ടുമുറ്റത്ത് നിന്ന് ബിജിചാക്കോ ഓടിപ്പോകുന്നത് കണ്ടു. തുടർന്ന് പൊലീസിൽ വിവരമറിയിച്ചു. പൊലീസിന്റെ അന്വേഷണത്തിൽ വീടിന് സമീപത്തുനിന്ന് ഇന്നലെ പുലർച്ചെയോടെ ബിജിയെ കസ്റ്റഡിയിലെടുക്കുകയായിരുന്നു. ആലപ്പുഴയിൽ നിന്ന് ഫോറൻസിക് വിഭാഗമെത്തി പ്രാഥമിക പരിശോധനകൾ നടത്തി. ബിജിക്കെതിരെ പുളിക്കീഴ് സ്റ്റേഷനിൽ മാത്രം രണ്ട് ക്രിമിനൽ കേസുകളുണ്ടെന്ന് പൊലീസ് പറഞ്ഞു. സി.ഐ ഇ.ഡി.ബിജുവിന്റെ നിർദ്ദേശപ്രകാരം എസ്.ഐ പി.കെ. കവിരാജ്, എ.എസ്.ഐ.മാരായ സദാശിവൻ, പ്രകാശ്, സി.പി.ഒ.മാരായ നവീൻ, പ്രദീപ്, സി.വി. പ്യാരീലാൽ, രജീഷ് എന്നിവരുടെ സംഘമാണ് പ്രതിയെ പിടികൂടിയത്.