ഓച്ചിറ: ചങ്ങൻകുളങ്ങര എസ്.ആർ.വി.യു.പി സ്കൂളിൽ വിദ്യാരംഗം കലാസാഹിത്യ വേദിയുടെ നേതൃത്വത്തിൽ വ്യത്യസ്തമായ രീതിയിൽ വൈക്കം മുഹമ്മദ്ബഷീർ അനുസ്മരണം നടത്തി. ബഷീറിന്റെ കഥാപാത്രങ്ങളെ അവതരിപ്പിച്ചുകൊണ്ടാണ് കുട്ടികൾ അദ്ദേഹത്തെ അനുസ്‌മരിച്ചത്. പാത്തുമ്മയുടെ ആട്, പൂവൻ പഴം എന്നീ കഥകൾ പുതിയ തലമുറയ്ക്ക് അനുഭവവേദ്യമാക്കി, അദ്ദേഹത്തിന്റെ ഭാഷയും വേഷവും കുട്ടികളിലേക്ക് എത്തിക്കുന്ന തരത്തിലായിരുന്നു അവതരണം. ബഷീറിന്റെ ചാരുകസേരയും വേഷവും ആടും പാത്തുമ്മയും ജമീലയും അബൂബക്കറും കുട്ടികളിൽ കൗതുകമുണർത്തി. ഹെഡ്മിസ്ട്രസ് സിന്ധു, അദ്ധ്യാപകരായ ആർ.ബി.മമത, ജി.ഉഷ, എസ്.കൃഷ്ണകുമാർ, ജി.ബെന്നി, സാഹിതി തുടങ്ങിയവർ നേതൃത്വം നൽകി.