കൊല്ലം: പെരുമണിൽ സ്വകാര്യബസും ബൈക്കും കൂട്ടിയിടിച്ച് ബൈക്ക് യാത്രക്കാരനായ യുവാവിന് ഗുരുതര പരിക്ക്. പെരുമൺ എൻജിനീയറിംഗ് കോളജിന് സമീപം താമസിക്കുന്ന സുബീഷിനാണ് (34) പരിക്കേ​റ്റത്. ഇന്നലെ വൈകിട്ട് മൂന്നോടെ പെരുമൺ യു.പി.എസിന് സമീപത്തെ വളവിലായി​രുന്നു അപകടം. അഞ്ചാലുംമൂട്ടിൽ നിന്ന് പെരുമണിലേക്ക് പോയ സ്വകാര്യബസും എതിർദിശയിൽ വന്ന ബൈക്കുമാണ് കൂട്ടിയിടിച്ചത്. ഈ സമയം അതുവഴിവന്ന സ്‌കൂൾ ബസ് ഡ്രൈവർ പെരുമൺ സ്വദേശി സജീവ് തന്റെ ഓട്ടോറിക്ഷയിൽ സുബീഷിനെ മേവറത്തെ സഹകരണ ആശുപത്രിയിലെത്തിച്ചു. തലയ്ക്കും കാലിനും നട്ടെല്ലിനുമേറ്റ പരിക്ക് ഗുരുതരമായതിനെ തുടർന്ന് യുവാവിനെ തിരുവനന്തപുരം മെഡിക്കൽ കോളേജ് ആശുപത്രിയിലേക്ക് മാറ്റി. അഞ്ചാലുംമൂട് പൊലീസ് മേൽനടപടികൾ സ്വീകരിച്ചു.