കയ്പമംഗലം: കനത്ത മഴയിൽ എടത്തിരുത്തിയിൽ വീടുകൾക്ക് നാശനഷ്ടം. തെങ്ങുകൾ വീണ് രണ്ട് വീടുകൾ ഭാഗികമായി തകർന്നു. ചെന്ത്രാപ്പിന്നി ചാമക്കാല സ്വദേശി പാറാശ്ശേരി മോഹനന്റെ ഓടിട്ട വീട് ഭാഗികമായി തകർന്നു. തൊട്ടടുത്ത പറമ്പിലെ തെങ്ങ് കടപുഴകി വീണാണ് വീട് തകർന്നത്. എടത്തിരുത്തി സർദാർ വായനശാലയ്ക്ക് സമീപം താഴത്തുവീട്ടിൽ കൈരളിയുടെ ഓടിട്ട വീടും തെങ്ങ് വീണ് ഭാഗികമായി തകർന്നിട്ടുണ്ട്. അപകടത്തിൽ ആർക്കും പരിക്കില്ല. പഞ്ചായത്ത്, വില്ലേജ് അധികൃതർ സ്ഥലത്തെത്തിയിരുന്നു.