വിതുര: മലയോരമേഖലയിൽ തമ്പടിച്ച കാട്ടുപന്നികൾ ജനങ്ങളുടെ ജീവനും സ്വത്തിനും ഭീഷണിയാകുന്നു. തൊളിക്കോട് - വിതുര, ആര്യനാട് പഞ്ചായത്തുകളിലാണ് കാട്ടുപന്നിശല്യം രൂക്ഷമാകുന്നത്. നാട്ടിൻപുറങ്ങളിലെ റബർതോട്ടങ്ങളിലും തരിശുഭൂമികളിലുമാണ് കാട്ടുപന്നികൾ തമ്പടിച്ചിരിക്കുന്നത്. സന്ധ്യമയങ്ങിയാൽ പന്നികളുടെ വിളയാട്ടമാണ്. നാട്ടിലെ കൃഷിയിടങ്ങളിൽ താണ്ഡവമാടുന്ന കാട്ടുപന്നികൾ കൃഷികളെല്ലാം നശിപ്പിക്കുകയാണ്. പാട്ടത്തിനെടുത്ത ഭൂമിയിൽ ബാങ്കിൽ നിന്ന് വായ്പയെടുത്തും പലിശയ്ക്കെടുത്തും ചെയ്യുന്ന വാഴ, മരച്ചീനി, പച്ചക്കറി കൃഷികളെല്ലാം കാട്ടുപന്നികൾ പിഴുതെറിയുകയാണ്. ലക്ഷക്കണക്കിന് രൂപയുടെ നഷ്ടമുള്ളതായി നാട്ടുകാർ പറയുന്നു. ആദിവാസി മേഖലകളിലെ അവസ്ഥയും വിഭിന്നമല്ല. വനപാലകർക്ക് നിരവധി തവണ പരാതി നൽകിയിട്ടും നടപടികൾ സ്വീകരിച്ചിട്ടില്ല.

ആക്രമണം തുടർക്കഥ, മരണം 2
കൃഷിനശിപ്പിക്കുന്നതിന് പുറമേ കാട്ടുപന്നികൾ ജീവനും കവരുന്നുണ്ട്. തൊളിക്കോട് പഞ്ചായത്തിൽ മാത്രം രണ്ട്പേരാണ് അടുത്തിടെ പന്നിയുടെ ആക്രമണത്തിൽ മരിച്ചത്. ചായം, നഗരഭാഗങ്ങളിലാണ് ബൈക്ക് യാത്രക്കിടയിൽ രണ്ടുപേർ പന്നിയുടെ ആക്രമണത്തിൽ മരിച്ചു. രാത്രിയിൽ ബൈക്കുകളിൽ സഞ്ചരിക്കാൻ കഴിയാത്ത സ്ഥിതിയാണ് നിലവിൽ, പകൽസമയത്തുപോലും പന്നിശല്യമുണ്ട്. പന്നിയുടെ ആക്രമണത്തിൽ ബൈക്കിൽ സഞ്ചരിച്ച രണ്ട് വീട്ടമ്മമാർക്കും ഗുരുതരമായി പരിക്കേറ്റിരുന്നു. പന്നി കുറുകെ ചാടിയതിനെ തുടർന്ന് ബൈക്കിൽ നിന്നും വീണ് നട്ടെല്ല് തകർന്ന യുവാവ് ഇപ്പോഴും ചികിത്സയിലാണ്. പുലർച്ചെ പത്രവിതരണത്തിന് എത്തിയ ഏജന്റിനെ ചാരുപാറ വച്ച് പന്നി ആക്രമിക്കാൻ ശ്രമിച്ച സംഭവവും ഉണ്ടായി.

**മാലിന്യക്കുന്നുകൾ
പൗൾട്രിഫാമുകളിൽ നിന്നുള്ള ഇറച്ചി വേസ്റ്റ് ചാക്കിലും പ്ലാസ്റ്റിക് കിറ്റുകളിലും നിറച്ച് രാത്രികാലങ്ങളിൽ നാഗര, ഭദ്രംവച്ചപാറ, വട്ടപ്പൻകാട്, കാലങ്കാവ് മേഖലകളിൽ കൊണ്ടിടുന്നുണ്ട്. മാലിന്യം തിന്നാൻ പന്നികൾ കൂട്ടമായെത്തുക പതിവാണ്. വിതുര ചാരുപാറ എം.ജി.എം പൊൻമുടിവാലി പബ്ലിക് സ്കൂളിന് സമീപത്തും ചേന്നൻപാറ വളവിലും നിക്ഷേപിക്കുന്ന മാലിന്യവും കാട്ടുപന്നികളെ ആകർഷിക്കുന്നതായി നാട്ടുകാർ പറയുന്നു.

പന്നിശല്യം ഇവിടെ

തൊളിക്കോട്, തേവൻപാറ, തുരുത്തി, തോട്ടുമുക്ക്, കന്നുകാലിവനം, ആനപ്പെട്ടി, പരപ്പാറ നാഗര, ഭദ്രംവച്ചപാറ, കാലങ്കാവ്, ചെറ്റച്ചൽ,പുളിച്ചാമല, ചായം, ചാരുപാറ,ജ്ഞാനിക്കുന്ന്,അരുവിക്കരമൂല, മൂന്നാംനമ്പർ,മണിതൂക്കി, പേരയം, മരുതാമല, ജഴ്സിഫാം, അടിപറമ്പ്, , ചാത്തൻകോട്, ചെമ്മാംകാല, കല്ലാർ,മൊട്ടമൂട്,ആറാനക്കുഴി,മംഗലകരിക്കകം,അല്ലത്താര,ചണ്ണനിരവട്ടം,ചാമക്കര,കൊമ്പ്രാംകല്ല്, ആനപ്പാറ, പേപ്പാറ, പട്ടൻകുളിച്ചപാറ, കളീക്കൽ, പൊന്നാംചുണ്ട്, നരിക്കല്ല്, തലത്തൂതക്കാവ്, പരപ്പാറ, മേമല, പൊൻപാറ, വിനോബാനികേതൻ, ചെരുപ്പാണി, തേവിയോട്, മൂന്നാംനമ്പർ, മേമല, പൊടിയക്കാല,കുട്ടപ്പാറ, പന്നിക്കുഴി, മണലി, ചെറ്റച്ചൽ കാലങ്കാവ്, വിനോബാനികേതൻ.