തിരുവനന്തപുരം: വിദ്യാഭ്യാസ സ്ഥപനങ്ങളിൽ നിന്നു വിനോദയാത്ര പോകുമ്പോൾ വാഹനത്തിന്റെ വിവരങ്ങൾ മോട്ടാർവാഹന വകുപ്പിൽ അറിയിക്കണം. എല്ലാ ഹയർ സെക്കൻഡറി സ്കൂളുകൾക്കും കോളേജുകൾക്കും ഈ അറിയിപ്പു നൽകണമെന്നാവശ്യപ്പെട്ട് ഉന്നതവിദ്യാഭ്യാസ വകുപ്പു തലവന്മാർക്ക് ഗതാഗത കമ്മിഷണർ നിർദ്ദേശം കൈമാറി.ആവശ്യമെങ്കിൽ മോട്ടോർവാഹന വകുപ്പ് ഉദ്യോഗസ്ഥർ പരിശോധന നടത്തിയ ശേഷമാകും ഇനി വിനോദയാത്ര.

വിനോദയാത്രയ്ക്കു മുന്നോടിയായി കൊല്ലത്ത് ബസിനു മുകളിൽ പൂത്തിരി കത്തിച്ചു തീ പടർന്ന സംഭവത്തെത്തുടർന്നാണ് മോട്ടോർവാഹന വകുപ്പിന്റെ കർശന നിർദ്ദേശം. ചില വിദ്യാഭ്യാസ സ്ഥാപനങ്ങളിൽ നിന്നുള്ള വിനോദയാത്രയ്ക്കു മുമ്പ് ബസിനു രൂപമാറ്റം വരുത്തുന്നതും കാതടപ്പിക്കുന്ന ശബ്ദം പുറപ്പെടുവിക്കുന്ന ഓഡിയോ സിസ്റ്റം ഘടിപ്പിക്കുന്നതും പതിവാണ്. ഇതു സംബന്ധിച്ച് നിരവധി പരാതികളാണ് മോട്ടോർ വാഹന വകുപ്പിനു മുന്നിലുള്ളത്.