തിരുവനന്തപുരം: കീറപ്പായയിൽ പട്ടിണികിടന്ന് മരിക്കാനുള്ളവരല്ല മലയാളികളെന്ന് കേന്ദ്രം ഭരിക്കുന്നവർ മനസിലാക്കണമെന്ന് എൽ.ഡി.എഫ് കൺവീനർ ഇ.പി. ജയരാജൻ പറഞ്ഞു. കിഫ്ബി മുഖേന സംസ്ഥാന സർക്കാർ ആവിഷ്‌കരിച്ച പദ്ധതികളെ തകർക്കാനാണ് ഇ.ഡിയെ ഉപയോഗിച്ചുള്ള കേന്ദ്ര ശ്രമമെന്നും അദ്ദേഹം പറഞ്ഞു. കെ.എസ്.ടി.എ ജില്ലാ കമ്മിറ്റിയുടെ നേതൃത്വത്തിൽ നടന്ന സെക്രട്ടേറിയറ്റ് മാർച്ച് ഉദ്ഘാടനം ചെയ്യുകയായിരുന്നു അദ്ദേഹം.

കേന്ദ്രസർക്കാരിന്റെ ജനവിരുദ്ധ നയങ്ങൾ തിരുത്തുക, കേരള സർക്കാരിന്റെ ബദൽ നയങ്ങൾക്ക് ശക്തി പകരുക, ദേശീയ വിദ്യാഭ്യാസ നയം തള്ളിക്കളയുക, വിദ്യാകിരണം പ്രവർത്തനങ്ങൾ ശക്തമാക്കുക തുടങ്ങിയ ആവശ്യങ്ങളുന്നയിച്ചാണ് മാർച്ച് നടത്തിയത്. ജില്ലാ പ്രസിഡന്റ് സിജോവ് സത്യൻ അദ്ധ്യക്ഷനായി. സംസ്ഥാന ജനറൽ സെക്രട്ടറി എൻ.ടി. ശിവരാജൻ, സംസ്ഥാന പ്രസിഡന്റ് ഡി. സുധീഷ്, ജില്ലാ സെക്രട്ടറി വി. അജയകുമാർ തുടങ്ങിയവർ പങ്കെടുത്തു.