തിരുവനന്തപുരം: വട്ടിയൂർക്കാവിലെ സി.പി.എം ബ്രാഞ്ച് കമ്മിറ്റി ഓഫീസ് അടിച്ചുതകർത്തതുമായി ബന്ധപ്പെട്ട് രണ്ട് ഡി.വൈ.എഫ്‌.ഐ പ്രവർത്തകരെ സസ്‌പെൻഡ് ചെയ്തു.വട്ടിയൂർക്കാവ് ലോക്കൽ കമ്മിറ്റി അംഗങ്ങളും ഡി.വൈ.എഫ്.ഐ നേതാക്കളുമായ രാജീവ്, നിയാസ് എന്നിവർക്കെതിരെയാണ് നടപടി. ഇരുവരെയും ആറു മാസത്തേക്കാണ് ലോക്കൽ കമ്മിറ്റിയിൽ നിന്ന് സസ്‌പെൻഡ് ചെയ്തത്. പാളയം ഏരിയാ സെക്രട്ടറി സി. പ്രസന്നകുമാറിന്റെ നേതൃത്വത്തിൽ ചേർന്ന വട്ടിയൂർക്കാവ് ലോക്കൽ കമ്മിറ്റി യോഗത്തിലാണ് തീരുമാനം. വിഷയം അന്വേഷിക്കാൻ പാർട്ടി കമ്മിഷനെയും നിയോഗിച്ചു. ഞായറാഴ്ചയായിരുന്നു സമൂഹമാദ്ധ്യമ പോസ്റ്റുമായി ബന്ധപ്പെട്ട തർക്കത്തെ തുടർന്ന് രാജീവും നിയാസും മേലത്തുമേലെ ബ്രാഞ്ച് ഓഫീസ് ആക്രമിച്ചത്. രണ്ട് സി.പി.എം പ്രവർത്തകർക്ക് പരിക്കേറ്റിരുന്നു.