മാവേലിക്കര: താലൂക്ക് സഹകരണ ബാങ്ക് തഴക്കര ശാഖയിലെ നിക്ഷേപം തിരികെ കിട്ടുന്നതിന് കാത്തു നിൽക്കാതെ ഒരാൾ കൂടി യാത്രയായി. തഴക്കര വഴുവാടി ആര്യഭവനത്തിൽ ത്യാഗരാജപ്പണിക്കർ (74) ആണ് മരിച്ചത്. പാർക്കി​ൻസൺ​സ് രോഗം ബാധി​ച്ച് കിടപ്പിലായ ത്യാഗരാജന് മാസം 70000 രൂപയോളം ചികിത്സയ്ക്ക് ചിലവായിരുന്നു.

ത്യാഗരാജ പ്പണി​ക്കരുടെയും ഭാര്യ വിജയകുമാരിയുടേയും പേരിൽ എട്ടര ലക്ഷം രൂപയോളം മാവേലിക്കര താലൂക്ക് സഹകരണ ബാങ്കിൽ നിക്ഷേപമായുണ്ടായിരുന്നു. ചികിത്സാ ചിലവുകൾക്കായി ‌ ഈ പണം ലഭി​ക്കാൻ ഇവർ നിരന്തരം ആവശ്യപ്പെട്ടിട്ടും ലഭി​ച്ചി​ല്ല.

ഇതോടെ താലൂക്ക് സഹകരണ ബാങ്കി​ലെ നി​ക്ഷേപം തി​രി​കെ കി​ട്ടും മുമ്പേ മരണത്തി​ന് കീഴടങ്ങി​യവരുടെ എണ്ണം എട്ടായി​. രോഗശയ്യയിലായ നിരവധി പേർ ഇപ്പോൾ ചികിത്സാ ചിലവിനായി​ നി​ക്ഷേപത്തുക തി​രി​കെ കി​ട്ടാൻ കേണുകൊണ്ടിരിക്കുകയാണ്. നിക്ഷേപകരിൽ 60 ശതമാനത്തിന് മുകളിൽ 65 വയസ് പിന്നിട്ടവരാണ് . 2016 ഡിംബറിലാണ് മാവേലിക്കര താലൂക്ക് സഹകരണ ബാങ്കിന്റെ തഴക്കരശാഖയിൽ തട്ടിപ്പ് നടന്നതായുള്ള വിവരം പുറത്ത് വരുന്നത്. വ്യാജ വായ്പകൾ നല്‍കിയും. ഉരുപ്പടികളില്ലാതെ സ്വർണ വായ്പ നല്‍കിയുമൊക്കെയായിരുന്നു തട്ടിപ്പ്.