കുട്ടനാട്: കനത്ത മഴയും കി​ഴക്കൻവെള്ളത്തി​ന്റെ വരവും മൂലം കുട്ടനാട്ടി​ൽ കഴിഞ്ഞ ഒറ്റരാത്രികൊണ്ട് ഒന്നരയടിയിലേറെ ജലനി​രപ്പ് ഉയർന്നു. ഒട്ടുമി​ക്ക പ്രദേശങ്ങളും വെള്ളത്തി​ലാണ്. എ സി റോഡിൽ ഒന്നാങ്കര, പള്ളിക്കൂട്ടുമ്മ, മാമ്പുഴക്കരി, പാറയ്ക്കൽ ജംഗ്ഷനുകൾ തീർത്തും വെള്ളത്തിലായി. വെളിയനാട് കിടങ്ങറ കണ്ണാടി പുളിങ്കുന്ന് റോഡിൽ പുളിംചുവട് ജംഗ്ഷനും വെള്ളത്തി​ലാണ്.

കുട്ടനാട് മേഖലയിൽ പെട്ടന്ന് വെള്ളം കയറുന്ന പ്രദേശങ്ങളായ രാമങ്കരി, മുട്ടാർ, വെളിയനാട്, കൈനകരി, അപ്പർ കുട്ടനാടൻ മേഖലയായ തകഴി, തലവടി പ്രദേശങ്ങളി​ൽ അവസ്ഥ മോശമാണ്. പല കുടുംബങ്ങളേയും ദുരിതാശ്വാസ ക്യാമ്പുകളിലേക്ക് മാറ്റി.

രാമങ്കരി എൻ.എസ്.എസ് ഹയർസെക്കൻഡറി സ്കൂളിൽ ആരംഭിച്ച ക്യാമ്പി​ൽ വേഴപ്ര കുഴിക്കാല കോളനിയിലെ ആറു കുടുംബങ്ങളിൽ നിന്നായി 14പേരെയും മുട്ടാർ പഞ്ചായത്തിൽ സെൻ്റ് ജോർജ്ജ് ഹയർ സെക്കൻഡറി​ സ്കൂളിലെ ക്യാമ്പി​ൽ എട്ടു കുടുംബങ്ങളെയും മാറ്റി പാർപ്പിച്ചു.

കൈനകരി പഞ്ചായത്തിൽ ഇന്ന് രാവിലെയോടെ ദുരിതാശ്വാസ ക്യാമ്പുകൾ തുറക്കും. വെളിയനാട് പഞ്ചായത്തിലും വീടുകൾ വെള്ളത്തി​ലാണ്. തലവടി പഞ്ചായത്ത് ഏഴാം വാർഡ് കുതിരച്ചാൽ പുതുവൽ കോളനി ഏറെക്കുറെ വെള്ളത്തിൽ മുങ്ങി. 12 കുടുംബങ്ങളെ ചക്കുളത്തുകാവ് ഓഡിറ്റോറിയത്തിലെ ക്യാമ്പി​ലേക്ക് മാറ്റി. പഞ്ചായത്തിലെ 4, 10, 9 വാർഡുകളിലെ സ്ഥിതിയും രൂക്ഷമാണ്. തകഴിയിൽ കുന്നുമ്മ മദ്രസയിലും ചിറയത്തും രണ്ടു ക്യാമ്പുകളിലായി എട്ടുകുടുംബങ്ങളെയും മാറ്റിപ്പാർപ്പിച്ചിട്ടുണ്ട്.