ചേർത്തല: മുഹമ്മ പൊലീസ് സ്​റ്റേഷൻ പരിസരത്ത് ബഹുനില പൊലീസ് ക്വാർട്ടേഴ്‌സ് സമുച്ചയം നിർമ്മിക്കുന്നതിന് നടപടികൾ ആരംഭിച്ചതായി മന്ത്റി പി.പ്രസാദ് അറിയിച്ചു. ആലപ്പുഴ - മധുര സംസ്ഥാന പാതയോരത്ത് മുഹമ്മ പൊലീസ് സ്​റ്റേഷൻ പരിസരത്ത് ലഭ്യമായ ഒരേക്കറിലാണ് ഫ്ളാ​റ്റ് മാതൃകയിൽ ക്വാർട്ടേഴ്‌സ് നിർമ്മാണം. നിലവിൽ ജീർണാവസ്ഥയിൽ സ്ഥിതി ചെയ്യുന്ന ക്വാർട്ടേഴ്‌സുകൾ പൊളിച്ചു മാ​റ്റുന്നതിന് നടപടി ആരംഭിച്ചു. പുതിയ ഫ്ളാ​റ്റ് സമുച്ചയത്തിന്റെ എസ്​റ്റിമേ​റ്റ് ഉടൻ സമർപ്പിക്കുന്നതിന് പൊതുമരാമത്ത് കെട്ടിട വിഭാഗത്തോട് ആവശ്യപ്പെട്ടു. മുഹമ്മ, മാരാരിക്കുളം, മണ്ണഞ്ചേരി, ചേർത്തല പൊലീസ് സ്​റ്റേഷനുകളിൽ ജോലിചെയ്യുന്ന ഇരുനൂറോളം പൊലീസുകാർക്ക് മികച്ച സൗകര്യങ്ങളോടെയുള്ള താമസസൗകര്യം ലഭിക്കുന്ന തരത്തിലാണ് ക്വാർട്ടേഴ്സ് നിർമ്മാണമെന്ന് മന്ത്റി പറഞ്ഞു.