ആലപ്പുഴ : ജില്ലയിൽ ദുരന്ത നിവാരണ പ്രവർത്തനങ്ങളിൽ ദേശീയ ദുരന്ത പ്രതികരണ സേനയും (എൻ.ഡി.ആർ.എഫ്) പങ്കാളികളാകും. തമിഴ്‌നാട് ആരക്കോണം എൻ.ഡി.ആർ.എഫ് ഫോർത്ത് ബെറ്റാലിയനിലെ 21 പേരടങ്ങുന്ന സംഘത്തിന് നേതൃത്വം നൽകുന്നത് സബ് ഇൻസ്‌പെക്ടർമാരായ ദീപക് ചില്ലറും എ.ജഗന്നാഥനുമാണ്. ഇന്നലെ രാവിലെ കളക്ടറേറ്റിൽ എത്തിയ സംഘം കളക്ടർ വി.ആർ. കൃഷ്ണ തേജയുമായി കൂടിക്കാഴ്ച നടത്തി. ആവശ്യമനുസരിച്ച് വിവിധ കേന്ദ്രങ്ങളിൽ സേനയെ വിന്യസിക്കും. നിലവിൽ ജില്ലയിൽ ഗുരുതര സാഹചര്യമില്ലെന്നും അവശ്യഘട്ടത്തിൽ രക്ഷാപ്രവർത്തനം നടത്തുന്നതിന് അച്ചൻകോവിൽ, പമ്പ, മണിമല ആറുകളുമായി ബന്ധപ്പെട്ട് ജില്ലയെ മൂന്ന് മേഖലകളായി തിരിച്ചുള്ള പദ്ധതിയാണ് തയ്യാറാക്കിയിരിക്കുന്നതെന്നും കളക്ടർ പറഞ്ഞു.