ആലപ്പുഴ: കൃഷി വകുപ്പ് ആരംഭിച്ച 'ഞങ്ങളും കൃഷിയിലേക്ക്' പദ്ധതിയുടെ ഭാഗമായി മാദ്ധ്യമ പ്രവർത്തകർക്ക് ഗ്രോബാഗും വി​ത്തും വളവും വി​തരണം ചെയ്തു. കൃഷി വകുപ്പിന്റെയും ആലപ്പുഴ പ്രസ് ക്ലബ്ബിന്റെയും നേതൃത്വത്തിൽ നടന്ന പരിപാടിയുടെ ഉദ്ഘാടനം പ്രിൻസിപ്പൽ കൃഷി ഓഫീസർ സിബി നീണ്ടശ്ശേരി നിർവഹിച്ചു. പ്രസ് ക്ലബ്ബ് പ്രസിഡന്റ് എസ്. സജിത്ത് അദ്ധ്യക്ഷത വഹിച്ചു. വനിതാ സബ് കമ്മി​റ്റി ചെയർപേഴ്‌സൺ നിഷ മനോഹർ പച്ചക്കറി തൈകൾ ഏറ്റുവാങ്ങി. അസിസ്റ്റന്റ് പ്രിൻസിപ്പൽ കൃഷി ഓഫീസർ സുജ ഈപ്പൻ മുഖ്യ പ്രഭാഷണം നടത്തി. പ്രസ് ക്ലബ്ബ് ഡയറക്ടറി ആലപ്പുഴ നഗരസഭ വികസന സ്റ്റാൻഡിംഗ് കമ്മി​റ്റി ചെയർപേഴ്‌സൺ ബിന്ദു തോമസ് പ്രസ് ക്ലബ്ബ് മുൻ സെക്രട്ടറി എം.എം. ഷംസുദീന് നൽകി പ്രകാശനം ചെയ്തു. സെക്രട്ടറി ടി.കെ. അനിൽകുമാർ സ്വാഗതവും ജോയിന്റ് സെക്രട്ടറി ബിനീഷ് പുന്നപ്ര നന്ദിയും പറഞ്ഞു.