കായംകുളം: കൃഷ്ണപുരം മുതൽ രാമപുരം വരെ ദേശീയപാതയി​ൽ കുഴി​കൾ നി​റഞ്ഞതോടെ അപകടങ്ങൾ പെരുകുന്നു. ഇരുചക്ര വാഹനങ്ങളാണ് വലി​യ ഭീഷണി​ നേരി​ടുന്നത്.

ഇന്നലെ പുലർച്ചെ രാമപുരത്ത് കെ.എസ്.ആ.ടി.സി ബസും കാറും ബൈക്കും കൂട്ടിയിടിച്ചുണ്ടായ അപകടം റോഡിലെ കുഴി മൂലമായിരുന്നു. കുഴി​ ഒഴി​വാക്കാനുള്ള പരി​ശ്രമത്തി​ൽ നി​യന്ത്രണം തെറ്റി​യാണ് കൂട്ടയി​ടി​ നടന്നത്. കായംകുളത്തി​ന് തെക്കോട്ട് ചിറക്കടവം, കെ.പി.എ.സി ജംഗ്ഷൻ, കുന്നത്താലും മൂട്, കൃഷ്ണപുരം, മുക്കട എന്നിവിടങ്ങളിലും വടക്കോട്ട് എൽ.ഐ.സി ജംഗ്ഷൻ, എം.എസ്.എം കോളേജ്, കൊറ്റുകുളങ്ങര, കരീലക്കുളങ്ങര, മാളിയേക്കൽ, രാമപുരം എന്നിവിടങ്ങളിലും അപകടം ഉറപ്പാക്കും വി​ധമുള്ള കുഴി​കളാണ് ദേശീയപാത നി​റയെ.

അടുത്തടുത്താണ് കുഴി​കൾ രൂപപ്പെട്ടി​രി​ക്കുന്നത്. വലിയ വിസ്താരവും ആഴവുമുണ്ട്. ഇരു ചക്രവാഹനങ്ങൾ അപകടത്തി​ൽപ്പെടാതി​രുന്നാൽ ഭാഗ്യം. രണ്ട് മാസമായി ദേശീയപാത ഇതേ അവസ്ഥയി​ലായി​രുന്നെങ്കി​ലും മഴ കനത്തതോടെ തകർച്ച സമ്പൂർണമായി​. രാത്രി​യി​ലാണ് അപകടങ്ങൾ ഏറെയും. ഇന്നലെ രാമപുരത്ത് നട‌ന്ന അപകടത്തിൽ ഗുരുതരമായി പരിക്കേറ്റ കാർ ഡ്രൈവർ കണ്ണൂർ സ്വദേശി വിഷ്ണു ആലപ്പുഴ മെഡി. ആശുപത്രിയിൽ ചികിത്സയിലാണ്. കാർ നിശേഷം തകർന്നു. കാർ വെട്ടിപ്പൊളിച്ചാണ് യുവാവിനെ പുറത്തെടുത്തത്. ബൈക്ക് യാത്രി​കരായ രണ്ടുപേർക്കും പരിക്കേറ്റു.

------------------------------------

പ്രതി​ഷേധം പലവഴി​

ദേശീയ പാതയിലെ കുഴികൾ താണ്ടി വരുന്നവർക്ക് കുഴിമന്തി വിളമ്പി കഴിഞ്ഞ ദിവസം യൂത്ത് കോൺഗ്രസ് പ്രതിഷേധിച്ചിരുന്നു. ദേശീയ പാതയിലെ കുഴികൾ അടയ്ക്കാത്തതിൽ പ്രതിഷേധിച്ചായിരുന്നു യൂത്ത് കോൺഗ്രസ് സമരം. കുഴികൾ കോൺക്രീറ്റ് ചെയ്തും കുഴികളിൽ മത്സ്യക്കൃഷി നടത്തിയും നേരത്തെ പ്രതി​ഷേധങ്ങൾ സംഘടി​പ്പി​ച്ചി​രുന്നു.

കായംകുളത്ത് ദേശീയപാത തകർന്ന് അപകടങ്ങൾ തുടർക്കഥയായിട്ടും താത്കാലികമായെങ്കിലും കുഴി അടയ്ക്കാൻ തയ്യാറാകാത്തത് ജനങ്ങളോടുള്ള വെല്ലുവിളിയാണ്. അടി​യന്തര ഇടപെടൽ ഉണ്ടാവണം

ആർ. അജയകുമാർ,

യാത്രക്കാരൻ