ആലപ്പുഴ: തകഴിയിൽ ആലപ്പുഴ കു‌ടി​​വെള്ള പദ്ധതി​യുടെ പൈപ്പ് മാറ്റിയിടുന്ന ജോലികൾ ഇന്നലെ പുനരാരംഭിച്ചു. ആഗസ്റ്റ് 30ന് പൂർത്തിയാക്കുകയാണ് ലക്ഷ്യം.

പ്രതികൂല കാലാവസ്ഥയും റോഡ് പൊളിക്കാൻ പൊതുമരാമത്ത് വകുപ്പിന്റെ അനുമതി ലഭിക്കാത്തതുമാണ് രണ്ടുമാസത്തോളം പ്രവൃത്തി​കൾ മുടക്കി​യത്. കഴിഞ്ഞ മാസം 12ന് തിരുവനന്തപുരത്ത് നടന്ന ഉന്നതതല യോഗത്തി​ലാണ് പൈപ്പ് മാറ്റി​യി​ടൽ പൂർത്തീകരിക്കാൻ തീരുമാനിച്ചത്. രണ്ടര മീറ്റർ താഴ്ചയി​ൽ 700 മീറ്റർ ഭാഗത്തുകൂടി​ ഇനി​ പുതി​യ പൈപ്പ് ഇടേണ്ടതുണ്ട്.

തകഴി ഫെഡറൽ ബാങ്കിന് സമീപമാണ് കഴിഞ്ഞ ദിവസം പൈപ്പ് പൊട്ടിയത്. ഇതുൾപ്പെടെ മൂന്ന് വർഷത്തിനിടെ 72 തവണയാണ് പൈപ്പ് പൊട്ടിയത്. ഒരു മാസം മുമ്പ് തകഴിയിൽ പൈപ്പ് പൊട്ടി ദിവസങ്ങളോളം ആലപ്പുഴ നഗരത്തിലും സമീപപഞ്ചായത്തുകളിലും കുടിവെള്ള വിതരണം മുടങ്ങിയിരുന്നു.