ആലപ്പുഴ: ജില്ലാ നിയമ സേവന അതോറിട്ടി ജില്ലയിലെ എല്ലാ കോടതി കേന്ദ്രങ്ങളിലുമായി ദേശീയ ലോക് അദാലത്ത് 13ന് നടത്തുന്നു. നിലവിൽ കോടതികളുടെ പരിഗണയിലിരിക്കുന്നതും ഒത്തുതീർപ്പാക്കാവുന്നതുമായ കേസുകൾ, വാഹനാപകട നഷ്ടപരിഹാര കേസുകൾ, ബാങ്കുകൾ സമർപ്പിച്ച വായ്പ കുടിശിക സംബന്ധിച്ച കേസുകൾ, കെ.എസ്.ഇ.ബി, വാട്ടർ അതോറിട്ടി, ബി.എസ്.എൻ.എൽ, സ്വകാര്യ മൊബൈൽ കമ്പനികൾ, തൊഴിൽ വകുപ്പ് എന്നിവർ സമർപ്പിച്ച കേസുകൾ, രജിസ്‌ട്രേഷൻ വകുപ്പ് സമർപ്പിച്ച അണ്ടർ വാല്യൂവേഷൻ സംബന്ധിച്ച കേസുകൾ, ഏതെങ്കിലും കോടതിയുടെ പരിധിയിൽ വരാവുന്നതും നിയമപ്രകാരം ഒത്തുതീർപ്പാക്കാവുന്നതുമായ തർക്കങ്ങൾ എന്നിവയും ലോക് അദാലത്തിൽ പരിഗണിക്കും. മജിസ്‌ട്രേറ്റ്‌ കോടതികളിലെ പെറ്റി കേസുകൾ തീർപ്പാക്കുന്നതിന്റെ ഭാഗമായി 13നു സ്‌പെഷ്യൽ സിറ്റിംഗ് ഉണ്ടായിരിക്കും. ബന്ധപ്പെട്ട കക്ഷികൾ നേരിട്ടോ അഭിഭാഷകരിലൂടെ കോടതികളിൽ ഹാജരാകാവുന്നതാണെന്നും, എല്ലാ കക്ഷികളും അവസരം പരമാവധി പ്രയോജനപ്പെടുത്തണമെന്നും പ്രിൻസിപ്പൽ ഡിസ്ട്രിക്ട് ആൻഡ് സെഷൻസ് ജഡ്ജും ജില്ലാ നിയമ സേവന അതോറിട്ടി ചെയർമാനുമായ ജോബിൻ സെബാസ്റ്റ്യൻ അറിയിച്ചു .