ആലപ്പുഴ: ഫേസ്ബുക്കിലൂടെ തങ്ങളുടെ മാമനായി​ മാറി​യ കളക്ടറെ നേരിൽ കാണാൻ വിദ്യാർത്ഥികളെത്തി. പുറക്കാട് എസ്.എൻ.എം.എച്ച്.എസ്.എസിൽ എട്ട്, ഒൻപത്, പത്ത്, പ്ലസ്ടു ക്ലാസുകളിൽ പഠിക്കുന്ന നാൽപ്പതോളം വിദ്യാർത്ഥികളാണ് വെള്ളിയാഴ്ച കളക്ടറേറ്റിലെത്തിയത്.

സിവിൽ സർവീസ് പരീക്ഷ വിജയിക്കാനുള്ള വഴികളെക്കുറിച്ചാണ് പലർക്കും അറിയേണ്ടിയിരുന്നത്. പുതിയ കളക്ടർ ജില്ലയിൽ നടപ്പാക്കാൻ പോകുന്ന പദ്ധതി​കളെക്കുറിച്ചും ചോദ്യങ്ങളുയർന്നു. കൃത്യമായി സമയം ക്രമീകരിച്ച് പഠിച്ചാൽ വിജയം കൈവരിക്കാനാകുമെന്നും ദിവസവും പത്രം വായിക്കുകയും മാനനസിക- ശാരീരിക ആരോഗ്യം ഉറപ്പാക്കാൻ കളിക്കുകയും നന്നായി ഉറങ്ങുകയും വേണമെന്ന് കളക്ടർ പറഞ്ഞു. കളക്ടറുടെ കസേരയിൽ തൊടണമെന്ന് ആഗ്രഹം പറഞ്ഞ വിദ്യാർഥിനിക്ക് ആ കസേരയിൽ ഇരിക്കാൻ അവസരവും നൽകി. കളക്ടറുടെ മാതാപിതാക്കൾക്ക് വിദ്യാർത്ഥികൾ ഓണക്കോടി കൈമാറി.

സ്‌കൂൾ മാനേജർ എം.ടി. മധു, പ്രിൻസിപ്പൽ ഇ.പി.സതീശൻ, പ്രധാനാദ്ധ്യാപിക കെ.സി. ചന്ദ്രിക, എം.ആർ.പ്രേം, കെ.എസ്. സഞ്ജു എന്നി​വർക്കൊപ്പമാണ് കുട്ടികൾ എത്തിയത്. ലഹരി ഉപയോഗത്തിനെതിരെ ജാഗ്രത പുലർത്തണമെന്ന ഉപദേശം നൽകിയാണ് കളക്ടർ കുട്ടികളെ യാത്രയാക്കിയത്.