ചേർത്തല: വാരനാട് മാക്ഡവൽ മദ്യനിർമ്മാണശാല സർക്കാർ ഏ​റ്റെടുക്കണമെന്ന് ജെ.എസ്.എസ് സംസ്ഥാനകമ്മി​റ്റി ആവശ്യപ്പെട്ടു. ജില്ലയുടെ വ്യാവസായിക പുരോഗതിക്ക് അടിത്തറയിട്ട കെ.ആർ.ഗൗരിഅമ്മ മുൻകൈയെടുത്ത് സ്ഥാപിച്ച മാക്ഡവൽ കമ്പനി അടച്ചുപൂട്ടി. ഗ്ലാസ് ഫാക്ടറി, മണലിഷ്ടിക ഫാക്ടറി,സൂട്ടർ ഫാക്ടറി ഇവയെല്ലാം ഗൗരിഅമ്മയുടെ ശ്രമഫലമായുണ്ടായതാണ്. ജീവനക്കാരെ പിരിച്ചുവിടാനുള്ള നടപടിക്ക് തയ്യാറെടുക്കുമ്പോൾ സർക്കാരിന് ഏറെ വരുമാന സാദ്ധ്യതയുള്ള കമ്പനി സർക്കാർ ഏ​റ്റെടുക്കണമെന്ന് സംസ്ഥാന ജനറൽ സെക്രട്ടറി ആർ.പൊന്നപ്പൻ ആവശ്യപ്പെട്ടു. ഇത് സംബന്ധിച്ച് സർക്കാരിന് നിവേദനം നൽകാൻ ആർ.പൊന്നപ്പൻ, ജെ.ടി.യു.സി യൂണിയൻ ജനറൽ സെക്രട്ടറി ജ്ഞാന പ്രസാദ്,വൈസ് പ്രസിഡന്റ് പി.സി.സന്തോഷ് എന്നിവരുടങ്ങുന്ന സംഘത്തെ സംസ്ഥാന കമ്മിറ്റി ചുമതലപ്പെടുത്തി.