അ​മ്പ​ല​പ്പു​ഴ: ഇളയ കുട്ടിയെ അമ്മ സ്കൂളിൽ കൊണ്ടുപോയ സമയത്ത് വീട്ടിൽ നിന്ന് 11 വയസുകാരിയെ തട്ടിക്കൊണ്ടുപോകാൻ ശ്രമം. യുവാവിന്റെ തന്ത്രത്തെ കുട്ടി ബുദ്ധിപരമായി നേരിട്ടപ്പോൾ ഇയാൾ രക്ഷപ്പെടുകയായിരുന്നു.

‌ കാ​ക്കാ​ഴം വെ​ള്ളം തെ​ങ്ങി​ൽ ശ​ര​ത്-രാ​സ്മി​ൻ ദ​മ്പ​തി​ക​ളു​ടെ മ​ക​ളെ​ ത​ട്ടി​ക്കൊ​ണ്ടു പോ​കാനാണ് ശ്രമം നടന്നത്. കഴിഞ്ഞ ദിവസം രാവിലെ 10 മണിയോടെയായിരുന്നു സംഭവം. വീട്ടിൽ കളിച്ചു കൊണ്ടിരുന്ന കുട്ടിയോട് അമ്മയ്ക്കും അനുജത്തിക്കും വാ​ഹ​നാ​പ​ക​ടം ഉ​ണ്ടാ​യെ​ന്നും താൻ അച്ഛന്റെ സുഹൃത്താണെന്നും വേഗം ത​ന്നോ​ടൊ​പ്പം വ​രണമെന്നും യുവാവ് പറഞ്ഞു. എന്നാൽ, വീടിന്റെ വാതിൽ തുറക്കാതെ, പി​താ​വ് പൊ​ലീ​സി​ലാ​ണെ​ന്നും ഫോണിൽ വിളിക്കാനും കുട്ടി പറ​ഞ്ഞ​തോ​ടെ യുവാവ് ക​ട​ന്നു​ക​ളയുകയായിരുന്നു. പി​ന്നീ​ട് അമ്മ തി​രി​കെ​യെ​ത്തി​യ​ ശേ​ഷം പൊലീസിൽ പരാതി നൽകി. അ​മ്പ​ല​പ്പു​ഴ കെ. എ​സ്.ഇ​.ബി ജീവനക്കാരനാണ് ശരത്ത്. അമ്പലപ്പുഴ പൊലീസ് അന്വേഷണം ആരംഭിച്ചു.