മാവേലിക്കര: ചവറയിലെ കേന്ദ്ര പൊതുമേഖല സ്ഥാപനമായ ഇന്ത്യൻ റെയർ എർത്ത്സ് ലിമിറ്റഡിൽ കരാർ അടിസ്ഥാനത്തിൽ ജോലി വാഗ്ദാനം ചെയ്ത് നിരവധി പേരിൽ നിന്നു പണം തട്ടിയ യുവാവ് പിടിയിൽ. മാവേലിക്കര പല്ലാരിമംഗലം തൈവിളയിൽ വീട്ടിൽ വാടകയ്ക്ക് താമസിക്കുന്ന കരുനാഗപ്പള്ളി മരുതൂർകുളങ്ങര വടക്ക് മങ്ങാട്ട് തെക്കേത്തറ വീട്ടിൽ സുകു ഭവാനന്ദനെയാണ് (39) മാവേലിക്കര പൊലീസ് അറസ്റ്റ് ചെയ്തത്.

മുമ്പ് ഐ.ആർ.ഇയിൽ കരാർ അടിസ്ഥാനത്തിൽ ജോലി ചെയ്തിരുന്ന ഇയാൾ മാവേലിക്കര മുള്ളിക്കുളങ്ങര, ചെട്ടികുളങ്ങര, തഴക്കര, പല്ലാരിമംഗലം, വീയപുരം, ഹരിപ്പാട്, ആലപ്പുഴ, പാലക്കാട് സ്വദേശികളായ 25 പേരിൽ നിന്നു 6000 മുതൽ 12000 രൂപ വരെ തട്ടിയെടുത്തെന്നാണ് പരാതി. ഇയാളുടെ വീട്ടിൽ നിന്നു നിരവധി പേരുടെ ബയോഡേറ്റകളും രേഖകളും പിടിച്ചെടുത്തിട്ടുണ്ട്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു. തട്ടിപ്പിനിരയായ കൂടുതൽപേർ പരാതിയുമായി എത്തുന്നുണ്ട്. മാവേലിക്കര പൊലീസ് ഇൻസ്പെക്ടർ സി.ശ്രീജിത്ത്, എസ്.ഐ അലി അക്ബർ, സീനിയർ സി.പി.ഒ എൻ.എസ്. സുഭാഷ് എന്നിവർ ചേർന്നാണ് പ്രതിയെ അറസ്റ്റ് ചെയ്തത്.