ന്യൂഡൽഹി: കരിമണൽ ഖനനത്തിന് സ്വകാര്യമേഖലയ്ക്ക് അനുമതി നൽകുന്ന നിയമ ഭേദഗതി നിർദ്ദേശം പിൻവലിക്കണമെന്ന ആവശ്യം പരിശോധിക്കാമെന്ന് പ്രധാനമന്ത്രി ഉറപ്പു നൽ​കിയെന്ന് എൻ.കെ. പ്രേമചന്ദ്രൻ എം.പി അറിയിച്ചു. നിയമ ഭേദഗതി ഐ.ആർ.ഇ, കെ.എം.എം.എൽ, ടി.ടി.പി തുടങ്ങിയ പൊതുമേഖലാസ്ഥാപനങ്ങളുടെ നിലനിൽപ്പിനെ ബാധിക്കുമെന്ന് എം.പി ചൂണ്ടിക്കാട്ടി. ആശങ്കയകറ്റാൻ ഖനന,​ ആണോവർജ്ജ മന്ത്രിമാരുടെ സംയുക്ത യോഗം വിളിക്കുമെന്നാണ് ഉറപ്പ്. ചവറയിൽ നാഷണൽ മിനറൽ റിസർച്ച് ഇൻസ്റ്റിറ്റ്യൂറ്റ് ആരംഭിക്കണമെന്നും റെയർ എർത്ത് മിനറൽസിന്റെ റിസൈക്ളിംഗിനായി പദ്ധതി നടപ്പാക്കണമെന്നും പ്രേമചന്ദ്രൻ ആവശ്യപ്പെട്ടു.