തൃപ്പൂണിത്തുറ: പുത്തൻകാവ് പൂത്തോട്ട 8, 9 വാർഡുകളിൽ രൂക്ഷമായ പേപ്പട്ടി ശല്യം ജനങ്ങളെ ഭീതിയിലാഴ്ത്തുന്നു. കഴിഞ്ഞ വെള്ളിയാഴ്ച ഒമ്പതാം വാർഡി​ൽ ചത്ത ഒരു നായയുടെ മൃതദേഹം പോസ്റ്റുമോർട്ടം ചെയ്തപ്പോൾ റിപ്പോർട്ട് പോസി​റ്റീവ് ആയിരുന്നു. തിങ്കളാഴ്ച മുതൽ പലരെയും ഓടിനടന്ന് കടിക്കുകയും വിദ്യാർത്ഥികൾ ഉൾപ്പെടെയുള്ള വഴിയാത്രക്കാരെ ആക്രമി​ക്കുകയും ചെയ്ത മറ്റൊരു നായ ചൊവ്വാഴ്ച എട്ടാം വാർഡി​ൽ ചത്തതായി കാണപ്പെട്ടു. ആ നായയയ്ക്കും പേവിഷബാധയാണെന്നാണ് ഇന്നലെ വൈകിട്ട് കിട്ടിയ റിപ്പോർട്ട്. വളർത്ത് മൃഗങ്ങളുമായി ഇടപെടുന്നവരും കാൽനടയാത്രക്കാരും പ്രത്യേകം ജാഗ്രത പുലർത്തണമെന്ന് ഉദയംപേരൂർ പഞ്ചായത്ത് 8-ാം വാർഡ് മെമ്പർ എം.പി. ഷൈമോൻ അറി​യി​ച്ചു.