തൃക്കാക്കര: വിദ്യാഭ്യാസത്തോടൊപ്പം ധാർമ്മിക മൂല്യങ്ങളുമാണ് ഉത്തമ സമൂഹ സൃഷ്ടിക്ക് ആവശ്യമെന്ന് ഗവർണർ ആരിഫ് മുഹമ്മദ് ഖാൻ പറഞ്ഞു. റോട്ടറി ക്ലബ് കോഴിക്കോടും സൺറൈസ് ആശുപത്രിയും സംയുക്തമായി ആരംഭിച്ച സേവ് ലംഗ് സേവ് ലൈഫ് പദ്ധതി കാക്കനാട് സൺറൈസ് ആശുപത്രിയിൽ ഉദ്ഘാടനം ചെ യ്യുകയായിരുന്നു അദ്ദേഹം.

വിദ്യാഭ്യാസത്തോടൊപ്പം ഇന്ത്യൻ സംസ്‌കാരത്തിന്റെ പിൻബലത്തിൽ ആർജ്ജി​ച്ച ധാർമ്മിക മൂല്യങ്ങൾ കൊവിഡ് കാലത്ത് ഗുണം ചെയ്തു. ഡോക്ടർമാർക്കും നഴ്‌സുമാർക്കും കൊവിഡ് മുന്നണി പോരാളികൾക്കും സ്വന്തം കുടുംബാഗങ്ങളെയെന്ന പോലെ ഓരോ രോഗിയെയും പരിചരിക്കാൻ സാധിച്ചു. കൊവിഡിനെ തുടർന്ന് രോഗികൾക്കുണ്ടാകുന്ന ന്യുമോണിയ ഫംഗൽ ബോൾ, ബ്ലാക്ക് ഫംഗസ്, നെഞ്ചിലെ പഴുപ്പ് (എമ്പീമ), വിണ്ടുകീറിയ ശ്വാസകോശം (ബ്രോങ്കോ പ്ലുരൽ ഫിസ്റ്റുല), ശ്വാസകോശം ബലൂൺ പോലെയാകുന്ന അവസ്ഥ (ബുള്ള ബ്രോങ്കിയക്ടാസിസ്) തുടങ്ങിയ രോഗം ബാധിച്ച നിർദ്ധനരായ 25 രോഗികൾക്ക് സൗജന്യ ശസ്ത്രക്രിയ നടത്തുന്നതാണ് 75 ലക്ഷം രൂപ ചെലവ് വരുന്ന പദ്ധതി. ഇന്ത്യയിൽ ആദ്യമായി ഇത്തരത്തിലുള്ള ശസ്ത്രക്രിയ നടത്തിയ ഡോ.നാസർ യൂസഫിനെ യോഗത്തിൽ ഗവർണർ ആദരിച്ചു.
അപ്രതീക്ഷിത മാരികളെ നേരിടാൻ വ്യക്തികളുടെ ഹെൽത്ത് ഡാറ്റ സർക്കാർ തലത്തിൽ തയ്യാറാക്കുന്നത് ഗുണം ചെയ്യുമെന്ന് അദ്ധ്യക്ഷത വഹിച്ച പ്രതിപക്ഷനേതാവ് വി.ഡി.സതീശൻ പറഞ്ഞു. ഉമ തോമസ് എം.എൽ.എ., തൃക്കാക്കര മുനിസിപ്പൽ ചെയർപേഴ്‌സൺ അജിത തങ്കപ്പൻ, ആശുപത്രി ചെയർമാൻ ഡോ. ഹഫീസ് റഹ്മാൻ, മാനേജിംഗ് ഡയറക്ടർ പർവീൺ ഹഫീസ്, തൊറാസിക് സർജനും കോഴിക്കോട് റോട്ടറി ക്ലബ്ബ് പ്രസിഡന്റുമായ ഡോ.നാസർ യൂസഫ്, കോഴിക്കോട് റോട്ടറി ചാർട്ടർ ഗവർണർ ഡോ.രാജേഷ് സുഭാഷ് എന്നിവരും സംസാരി​ച്ചു.