പെരുമ്പാവൂർ: യുവാവിനെ തട്ടിക്കൊണ്ടുപോയി ദേഹോപദ്രവം ഏൽപ്പിച്ച് പണം കവർന്ന കേസിൽ ഒരാൾകൂടി പിടിയിൽ. അസം നാഗോൺ സ്വദേശി മസീബുർ റഹ്‌മാനെയാണ് (32) പെരുമ്പാവൂർ പൊലീസ് അറസ്റ്റ് ചെയ്തത്. 2021 ഡിസംബറിലാണ് സംഭവം. പെരുമ്പാവൂർ ടൗണിൽ നിന്ന് രാത്രി മൂന്നുപേർചേർന്ന് അസാം സ്വദേശി ബാബുൽ ഇസ്ലാമിനെ കാറിൽ ബലമായി കയറ്റിക്കൊണ്ടുപോയി ദേഹോപദ്രവം ഏൽപിച്ച് അമ്പതിനായിരം രൂപ തട്ടിയെടുക്കുകയായിരുന്നു.

സംഭവത്തിൽ രണ്ടുപേരെ നേരത്തെ അറസ്റ്റ് ചെയ്തിരുന്നു. ഒളിവിലായിരുന്ന പ്രതിയെ നെടുമ്പാശേരിയിൽനിന്നാണ് പിടികൂടിയത്. അന്വേഷണസംഘത്തിൽ ഇൻസ്‌പെക്ടർ ആർ. രഞ്ജിത്ത്, എസ് ഐമാരായ റിൻസ് എം.തോമസ്, ജോസി എം.ജോൺസൺ, എസ്.സി.പി.ഒ വി.എം. ജമാൽ, അബ്ദുൾ മനാഫ്, കെ.എ. അഭിലാഷ് എന്നിവരാണ് ഉണ്ടായിരുന്നത്.