കൊച്ചി: ചിത്രകാരനും കലാസംവിധായകനും ഗ്രന്ഥകാരനുമായ നേമം പുഷ്പരാജിന്റെ പുതിയ ചിത്രങ്ങളുടെയും ശില്പങ്ങളുടെയും പ്രദർശനം 'ഡിസ്റ്റോപ്പിയ' പത്തിന് ആരംഭിക്കും. ഡർബാർ ഹാളിലെ മൂന്ന് ഗാലറികളിൽ ആരംഭിക്കുന്ന പ്രദർശനം 20ന് സമാപിക്കും. പ്രൊഫ. എം കെ സാനു ഉദ്ഘാടനം നിർവഹിക്കും. ചിത്രകാരൻ ബി.ഡി. ദത്തൻ, കെ.വി. മോഹൻ കുമാർ, ശിൽപി അനിലാ ജേക്കബ്, എം.എൽ. ജോണി, ടി.ആർ. അജയൻ, മുരളി ചീരോത്ത്, നേമം പുഷ്പരാജ് എന്നിവർ പങ്കെടുക്കും. നീതി ബോധവും ധാർമികതയും നഷ്ടപ്പെടുന്ന നവ ദേശീയതാ ബോദ്ധ്യങ്ങളോടുള്ള പ്രതികരണങ്ങളാണ് തന്റെ ചിത്രങ്ങളിലുള്ളതെന്ന് നേമം പുഷ്പരാജ് പറഞ്ഞു. അമ്പതോളം ചിത്രങ്ങളും ശില്പങ്ങളും പ്രദർശനത്തിലുണ്ടാകും.